جہلم پولیس کا ضلع بھر میں سپیشل سرچ آپریشنز اور ناکہ بندی، 395 افراد کی چیکنگ

3

جہلم پولیس نے ضلع بھر میں دہشت گردوں اور جرائم پیشہ عناصر کی سرکوبی اور اہم تنصیبات کی سیکیورٹی کو فول پروف بنانے کے لیے سپیشل سرچ آپریشنز اور ناکہ بندی کا سلسلہ جاری رکھا۔

ضلع بھر میں 14 مختلف مقامات پر سرچ آپریشنز کے دوران مجموعی طور پر 395 افراد کی جانچ کی گئی۔

پولیس کے مطابق شہریوں کی ویری فکیشن پولیس ایپلی کیشن کے ذریعے کی گئی، جبکہ شہر کے داخلی و خارجی راستوں پر سپیشل ناکہ بندی کے ساتھ چیکنگ بھی کی گئی۔

سرچ آپریشنز کا مقصد مجرمان اشتہاری، جرائم پیشہ افراد اور سماج دشمن عناصر کی گرفتاری، غیر قانونی اسلحہ اور منشیات کی برآمدگی اور شرپسندوں کو مذموم عزائم پر عمل کرنے سے روکنا تھا۔

ڈی پی او جہلم طارق عزیز سندھو نے کہا کہ ضلع بھر میں عوام کی جان و مال کے تحفظ کے لیے پولیس کی یہ کارروائیاں جاری رہیں گی اور کسی بھی قانون شکن عنصر کو کسی رعایت کے ساتھ نہیں چھوڑا جائے گا۔