اسسٹنٹ کمشنر تیمور خان کا بازاروں کا دورہ، گراں فروشوں کو جرمانے
دینہ: ڈپٹی کمشنر جہلم میر رضا اوزگن کی ہدایت پر اسسٹنٹ کمشنر دینہ تیمور خان نے رمضان المبارک کے پیش نظر بازاروں کا خصوصی دورہ کیا اور اشیائے خوردونوش کی قیمتوں اور معیار کا معائنہ کیا۔
دورے کا مقصد مقدس مہینے میں شہریوں کو سستی اور معیاری اشیا کی فراہمی یقینی بنانا اور ناجائز منافع خوری کا سدباب کرنا تھا۔ ڈپٹی کمشنر جہلم نے واضح کیا ہے کہ رمضان المبارک کے دوران مصنوعی مہنگائی پیدا کرنے والوں کے ساتھ آہنی ہاتھوں سے نمٹا جائے گا۔
معائنے کے دوران اسسٹنٹ کمشنر تیمور خان نے پھلوں، سبزیوں اور دیگر ضروری اشیا کے نرخ چیک کیے اور دکانداروں کو سرکاری ریٹ لسٹ نمایاں جگہوں پر آویزاں کرنے کی سخت ہدایت کی۔ انہوں نے گراں فروشی کرنے والے متعدد دکانداروں کو موقع پر جرمانے بھی کیے اور خبردار کیا کہ رمضان المبارک میں ذخیرہ اندوزی کسی صورت برداشت نہیں کی جائے گی۔
ڈپٹی کمشنر جہلم کے احکامات کے مطابق مقررہ قیمتوں سے زائد وصولی پر دکانیں سیل کر کے سخت قانونی کارروائی عمل میں لائی جائے گی۔
اسسٹنٹ کمشنر نے دکانداروں کو ہدایت کی کہ وہ رمضان المبارک کے تقدس کو مدنظر رکھتے ہوئے عوام کو ریلیف فراہم کریں اور ناجائز منافع خوری سے گریز کریں۔ انہوں نے مزید کہا کہ ضلعی انتظامیہ جہلم کی پرائس کنٹرول ٹیمیں روزانہ کی بنیاد پر مارکیٹوں کی نگرانی کر رہی ہیں تاکہ شہریوں کو خریداری کے دوران کسی قسم کی مشکلات کا سامنا نہ ہو۔
