جہلم: سماجی شخصیت فرحت کمال ضیاء نے اراضی کو قبرستان کیلئے مختص کروا کر ماڈل قبرستان تعمیر کروا دیا

جہلم شہر کے مرکزی قبرستان میں میتیں دفنانے کی جگہ ختم ہونے کے بعد معروف قانون دان سماجی شخصیت چوہدری فرحت کمال ضیاء نے اپنی اور اپنے عزیز و اقارب کی مدد سے ڈھوک جمعہ روڈ پر ماڈل قبرستان کی چار دیواری مکمل ، فاتحہ خوانی سمیت قرآن خوانی کرنے کے لئے آنے والوں کے لئے بینچزاور صاف پانی کی فراہمی کے لئے واٹر فلٹریشن پلانٹ تعمیر کروا دیا۔شہریوں نے چوہدری فرحت کمال ضیاء اور ان کے عزیز و اقارب کی خدمات پر خراج تحسین پیش کیا۔

تفصیلات کے مطابق ضلع جہلم کے معروف قانون دان سماجی شخصیت چوہدری فرحت کمال ضیاء کی ایک اور کوشش رنگ لے آئی پچھلے کئی سالوں سے مرکزی قبرستان میں میتیں دفنانے کی جگہ ناپید ہو چکی تھی جبکہ جگہ ناپید ہونے کیوجہ سے گورکند بھی مرنے والوں کے لواحقین سے من مرضی کے پیسے وصول کرلیتے تھے۔

جہلم شہر کی سماجی ، رفاعی ، فلاحی اور مذہبی تنظیموں کی طرف سے پرنٹ و الیکٹرانک میڈیا پر قبرستان میں جگہ کی عدم دستیابی کی خبریں شائع و نشر کی جاتی رہیں ،جس پر چوہدری فرحت کمال ضیاء نے ڈھوک جمعہ روڈ پر ڈپٹی کمشنر کے ساتھ باہمی مشاورت کے بعد متعدد کنال پر مشتمل اراضی کو قبرستان کے لئے مختص کروایا اور اپنے عزیز و اقارب کی مدد سے قبرستان کو ماڈل قبرستان کی طرز پر تیار کروایا گیاہے۔

قبرستان کی بیرونی دیوار کے ساتھ قرآن خوانی ، فاتحہ خوانی کے لئے آنے والے افراد کے بیٹھنے کے لئے بینچز وغیرہ نصب کروائے گئے ہیں ، قبرستان کے اندر پھولدار، پھلدار ، سایہ دار پودے لگانے کے ساتھ ساتھ صاف پانی کی فراہمی کے لئے واٹر فلٹریشن پلانٹ تعمیرکروا دیا ہے ، جس سے قبرستان میں آنے والے افراد سمیت اہل محلہ مستفید ہونگے۔

قابل ذکر بات یہ ہے کہ مرکزی قبرستان میں جگہ کی عدم دستیابی کیوجہ سے گورکند مرنے والے لواحقین سے 30 سے 35 ہزار روپے وصول کرلیتے تھے چوہدری فرحت کمال کی ذاتی کوشش و کاوشوں کی وجہ سے گورکندوں کے لئے باقاعدہ ریٹس مقرر کردیئے گئے ہیں۔

اس پر شہریوں نے چوہدری فرحت کمال ضیاء اور ان کے عزیز رشتے داروں کی خدمات پر انہیں خراج تحسین پیش کیا اور اس امید کا اظہار کیا کہ معروف قانون دان چوہدری فرحت کمال ضیاء اور ان کے عزیز و رشتے دار ، دوست احباب فلاحی کاموں میں بڑھ چڑھ کر حصہ لیتے رہیں گے۔