ہنگامی حالات سے نمٹنے کیلئے راج بخش ٹرسٹ ہائر سیکنڈری اسکول میں جہلم پولیس کی موک ایکسرسائز
42
پنڈدادنخان: ڈسٹرکٹ پولیس آفیسر جہلم طارق عزیز سندھو کی ہدایت پر ضلع جہلم میں امن و امان کی صورتحال کو مزید مضبوط بنانے اور کسی بھی ہنگامی یا ممکنہ دہشت گردی کے واقعہ سے نمٹنے کے لیے پنڈدادنخان میں ایک جامع موک ایکسرسائز کا انعقاد کیا گیا۔
یہ فرضی مشق راج بخش ٹرسٹ ہائر سیکنڈری اسکول پنڈدادنخان میں ایس ڈی پی او پنڈدادنخان سرکل اور ان کی ٹیم کی نگرانی میں کی گئی۔
موک ایکسرسائز میں ایس ڈی پی او پنڈدادنخان سرکل کے ساتھ سی ٹی ڈی، ایلیٹ فورس، ریسکیو 1122، بم ڈسپوزل اسکواڈ، ٹریفک پولیس اور دیگر متعلقہ اداروں کی ٹیموں نے بھرپور شرکت کی۔ اس مشق کا مقصد ممکنہ دہشت گردی کے خطرے کی صورت میں پولیس اور معاون اداروں کے باہمی رابطے، بروقت ردِعمل اور پیشہ ورانہ صلاحیتوں کو جانچنا تھا۔
فرضی مشق کے دوران کالج کی عمارت کا مکمل حفاظتی معائنہ کیا گیا اور مشتبہ افراد کی نقل و حرکت پر فوری رسپانس کا عملی مظاہرہ کیا گیا۔ ایلیٹ فورس نے ریپڈ ایکشن لیتے ہوئے عمارت کی کلیئرنس آپریشن انجام دیا، جبکہ بم ڈسپوزل اسکواڈ نے حفاظتی سوئپ اور سرچ آپریشن کر کے کسی بھی ممکنہ خطرے کو ناکام بنانے کی مشق کی۔
ریسکیو 1122 کی ٹیموں نے زخمیوں کو فوری طبی امداد فراہم کرنے اور انہیں محفوظ مقامات پر منتقل کرنے کا عملی مظاہرہ کیا۔ اسی دوران ٹریفک پولیس نے ایمرجنسی روٹس کی ڈائیورشن اور ٹریفک مینجمنٹ کو مؤثر انداز میں کنٹرول کرنے کی مشق کی، تاکہ ہنگامی صورتحال میں شہریوں کو کم سے کم مشکلات کا سامنا کرنا پڑے۔
اس موقع پر ڈسٹرکٹ پولیس آفیسر جہلم طارق عزیز سندھو نے کہا کہ امن و امان کا قیام جہلم پولیس کی اولین ترجیح ہے۔ ایسی عملی فرضی مشقیں نہ صرف پولیس فورس اور دیگر اداروں کی پیشہ ورانہ مہارتوں میں اضافہ کرتی ہیں بلکہ کسی بھی ہنگامی صورتحال میں بروقت اور مؤثر کارروائی کو بھی یقینی بناتی ہیں۔ انہوں نے واضح کیا کہ شہریوں کا تحفظ ہر حال میں یقینی بنایا جائے گا اور جہلم پولیس کسی بھی چیلنج سے نمٹنے کے لیے مکمل طور پر تیار ہے۔
