جہلم میں پنجاب فوڈ اتھارٹی نے 1500 لیٹر مضر صحت دودھ تلف کر دیا

جہلم میں پنجاب فوڈ اتھارٹی نے 1500 لیٹر مضر صحت دودھ تلف کر دیا۔

ترجمان پنجاب فوڈ اتھارٹی جہلم کے مطابق فوڈ اتھارٹی جہلم نے ناقص اور غیر معیاری دودھ سپلائی کرنے والی گاڑیوں کو پکڑ کر مجموعی طور پر 1500 لیٹر ناقص دودھ برآمد کیا گیا، جسے موقع پر ہی تلف کر دیا گیا۔

فوڈ اتھارٹی نے بتایا کہ یہ کارروائیاں دوران ناکہ بندی روہتاس روڈ اور جی ٹی روڈ پر عمل میں لائی گئیں۔ دودھ سپلائی کرنے والی گاڑیاں منڈی بہاؤالدین سے جہلم کے لیے روانہ ہوئی تھیں اور شہر میں فروخت کے لیے لایا جا رہا تھا۔

ترجمان کے مطابق دودھ بردار گاڑیوں کے مالکان کو مجموعی طور پر 65 ہزار روپے جرمانہ بھی عائد کیا گیا۔ اس کے ساتھ ساتھ فوڈ اتھارٹی کی ٹیم نے 28 دودھ بردار گاڑیوں کو چیک کیا جن سے مجموعی طور پر 7 ہزار لیٹر دودھ کا معائنہ کیا گیا۔

فوڈ اتھارٹی کے مطابق یہ اقدامات عوام کو محفوظ اور معیاری خوراک کی فراہمی کو یقینی بنانے کے لیے کیے جا رہے ہیں اور ناقص دودھ فروخت کرنے والوں کے خلاف زیرو ٹالرنس پالیسی اپنائی جائے گی۔