انتظامیہ اور پرائس کنٹرول مجسٹریٹ کی جانب سے چھاپوں اور جرمانوں کے باوجود مہنگائی پر قابو نہ پایا جا سکا
جہلم: ضلعی انتظامیہ اور پرائس کنٹرول مجسٹریٹ کی جانب سے شہر و گردو نواح میں چھاپوں اور جرمانوں کے باوجود مہنگائی پر قابو نہ پایا جا سکا۔ گراں فروشوں اور اضافی نرخ وصول کرنے والے دکانداروں کے خلاف کارروائیاں صرف دعوؤں تک محدود جس کے باعث مصنوعی مہنگائی عروج پر پہنچ گئی ہے۔
صارفین مہنگے داموں دودھ، دہی، مرغی کا گوشت، بیف،مٹن، سبزیاں اور کر یا نہ خریدنے پر مجبور جبکہ بازاروں میں دکانداروں نے سرکاری نرخ ناموں کو شو پیس کے طور پر لٹکا رکھا ہے اور ہول سیلر سرکاری ریٹ لسٹ آویزاں کرنے کے باوجود نرخ ناموں پر عمل درآمد نہیں کر تے، ضلعی انتظامیہ اور پرائس کنٹرول مجسٹریٹس کی بڑی تعدادمہنگائی کو کنٹرول کرنے میں ناکام دکھائی دیتی ہے ۔
پرائس کنٹرول مجسٹریٹ نے ماہِ صیام میں کثیر تعداد میں جرمانے عائد کئے لیکن تمام کارروائیوں کے باوجود ضلع بھر میں مہنگائی کا طوفان برقرار ہے ، اشیا خور و نوش کے سرکاری نرخ نامے ضلعی انتظامیہ کے جاری کرنے کے باوجود کہیں عملدرآمد ہوتا دکھائی نہیں دیتاجس کی بنیادی وجہ پرائس کنٹرول مجسٹریٹس بڑے دکانداروں کو چیک کرنے کی بجائے چھوٹے دکانداروں کو جرمانے کرکے سب اچھا ہے کی رپورٹس بھجوا دیتے ہیں۔
شہری تنظیموں کے عمائدین نے وزیر اعلیٰ پنجاب مریم نواز شریف اور چیف سیکرٹری پنجاب سے مطالبہ کیاہے کہ ضلعی سربراہان کو علی الصبح سبزی و فروٹ منڈیوں میں اپنی موجودگی میں بولیا ں کروانے اور بغیر اطلاع ہوٹلوں، کریانہ مرچنٹس سمیت کارروباری مراکز کو چیک کرنے کے احکامات جاری کئے جائیں تاکہ موجودہ مہنگائی کی لہرکا خاتمہ ممکن ہو سکے۔
