ایڈیشنل ڈپٹی کمشنر کا وزیراعظم فیول سبسڈی پروگرام کے مراکز کا معائنہ، غیر حاضر اہلکار معطل
جہلم: ایڈیشنل ڈپٹی کمشنر انفورسمنٹ جہلم سارہ امجد نے وزیراعظم فیول سبسڈی پروگرام پر مؤثر عملدرآمد اور عوام تک فیول ریلیف کی بروقت فراہمی یقینی بنانے کے لیے ڈسٹرکٹ آفیسر انڈسٹریز اور پنجاب انفورسمنٹ اینڈ ریگولیٹری اتھارٹی کے انفورسمنٹ افسران کے ہمراہ مختلف پٹرول پمپس کا دورہ کیا۔
دورے کے دوران ایڈیشنل ڈپٹی کمشنر انفورسمنٹ نے وزیراعظم فیول سبسڈی پروگرام کے تحت قائم مراکز کا تفصیلی معائنہ کیا اور وہاں رجسٹریشن کے عمل، ٹوکن کی تصدیق، عوامی رہنمائی اور رعایتی پٹرول کی فراہمی کے انتظامات کا جائزہ لیا۔ انہوں نے متعلقہ عملے سے پروگرام کے تحت جاری سہولیات اور عوام کو درپیش مسائل کے حوالے سے بھی معلومات حاصل کیں۔
معائنے کے دوران سارہ امجد نے پروگرام کے مراکز پر تعینات اہلکاروں کی حاضری اور انہیں تفویض کردہ ذمہ داریوں کی انجام دہی بھی چیک کی۔ ڈیوٹی کے اوقات میں بعض اہلکاروں کے موقع پر موجود نہ ہونے پر انہوں نے سخت برہمی کا اظہار کیا اور متعلقہ غیر حاضر اہلکاروں کو فوری طور پر معطل کرنے کے احکامات جاری کیے۔
ایڈیشنل ڈپٹی کمشنر انفورسمنٹ نے واضح کیا کہ وزیراعظم فیول سبسڈی پروگرام براہِ راست عوامی ریلیف سے متعلق ہے، اس لیے اس میں فرائض کی انجام دہی کے دوران کسی قسم کی غیر حاضری، غفلت یا کوتاہی ہرگز برداشت نہیں کی جائے گی اور ذمہ دار اہلکاروں کے خلاف سخت جوابدہی یقینی بنائی جائے گی۔
انہوں نے متعلقہ افسران کو ہدایت کی کہ فیول سبسڈی پروگرام کے مراکز پر عملے کی مکمل حاضری، مؤثر فیلڈ نگرانی اور شہریوں کی بروقت رہنمائی ہر صورت یقینی بنائی جائے۔ انہوں نے رجسٹریشن سے لے کر ٹوکن کی تصدیق اور رعایتی پٹرول کی فراہمی تک پورے عمل کو شفاف، منظم اور بلاتعطل رکھنے پر زور دیتے ہوئے کہا کہ عوام کو حکومتی ریلیف کی فراہمی میں کسی قسم کی رکاوٹ یا غیر ضروری تاخیر نہیں ہونی چاہیے۔
