زرعی ترقی کیلئے پٹھوار ریجن میں لینڈ ڈویلپمنٹ اولین ترجیح ہے، ڈاکٹر حارث عبداللہ

جہلم: ڈاکٹر حارث عبداللہ نے کہا ہے کہ پٹھوار ریجن میں زرعی ترقی کے فروغ کے لیے لینڈ ڈویلپمنٹ کو اولین ترجیح دی جا رہی ہے، جبکہ واٹر ریسورسز مینجمنٹ کو دوسرے نمبر پر اہمیت حاصل ہے۔ انہوں نے کہا کہ حکومت پنجاب جدید زرعی نظام اور ماحولیاتی بہتری کے لیے عملی اقدامات کر رہی ہے۔

اپنے دورہ جہلم کے دوران گفتگو کرتے ہوئے ایڈیشنل ڈائریکٹر جنرل ایگریکلچر انجینئرنگ لاہور ریجن ڈاکٹر حارث عبداللہ نے بتایا کہ ان کے موجودہ دورے کا مقصد وزیراعلیٰ پنجاب کے خصوصی اقدامات (سی ایم انیشیٹو) کا جائزہ لینا بھی ہے تاکہ جاری منصوبوں کی پیش رفت اور کارکردگی کا تفصیلی معائنہ کیا جا سکے۔

انہوں نے وضاحت کی کہ سی ایم انیشیٹو کے تحت ہائی ٹیک اور موبلائزیشن پر مبنی ایک بڑا پراجیکٹ جاری ہے، جس کا مقصد وزیراعلیٰ پنجاب کے وژن کو مؤثر انداز میں عام کرنا اور کسانوں تک جدید زرعی سہولیات پہنچانا ہے۔ اس منصوبے کے تحت جدید زرعی مشینری، ٹیکنالوجی اور ترقیاتی اقدامات پر خصوصی توجہ دی جا رہی ہے۔

ڈاکٹر حارث عبداللہ نے مزید بتایا کہ “پی کیپ” (PCAP) کے نام سے ایک اہم پراجیکٹ بھی جاری ہے، جس کے تحت سموگ کے تدارک اور ماحولیاتی بہتری کے لیے مختلف اقدامات کیے جا رہے ہیں۔ انہوں نے کہا کہ ان منصوبوں کا تفصیلی جائزہ لینا بھی ان کے دورے کا اہم حصہ ہے تاکہ ماحولیاتی آلودگی میں کمی لائی جا سکے۔

انہوں نے کہا کہ لینڈ ڈویلپمنٹ کے جاری معمول کے منصوبوں کی کارکردگی اور پیش رفت کا جائزہ لینے کے لیے بھی متعلقہ ٹیم جہلم پہنچی ہے تاکہ زرعی شعبے کو جدید خطوط پر استوار کرتے ہوئے کسانوں کو زیادہ سے زیادہ سہولیات فراہم کی جا سکیں۔

ڈاکٹر حارث عبداللہ کا کہنا تھا کہ حکومت زرعی ترقی، زمین کی بہتری اور ماحولیاتی تحفظ کے لیے سنجیدہ اقدامات کر رہی ہے، اور ان منصوبوں کے مثبت نتائج جلد سامنے آئیں گے، جن سے کسانوں کو براہِ راست فائدہ پہنچے گا اور زرعی پیداوار میں اضافہ ممکن ہو سکے گا۔