جہلم میں چوری کی وارداتوں میں ملوث پھانا مانا گینگ کے 4 ملزمان گرفتار، مال مسروقہ برآمد

جہلم پولیس کی اہم کارروائی،چوری اور موٹر سائیکل چوری کی متعدد وارداتوں میں ملوث پھانا مانا گینگ کے 4 ملزمان کو گرفتار کر کے مال مسروقہ برآمد کر لیا۔

تفصیلات کے مطابق جہلم پولیس نے چوری اور موٹر سائیکل چوری کی متعدد وارداتوں میں ملوث پھانا مانا گینگ کے چار ملزمان کو گرفتار کر لیا۔ ڈی پی او جہلم طارق عزیز سندھو کی ہدایت پر ایس ایچ او تھانہ صدر اور ٹیم نے کارروائی کرتے ہوئے ملزمان سے بھاری مال مسروقہ برآمد کیا۔

پولیس کے مطابق برآمدگی میں 6 تولہ طلائی زیورات مالیتی 18 لاکھ 9 ہزار 500 روپے، ایک موبائل فون، 15 ہزار روپے نقدی، 5 عدد چوری شدہ موٹر سائیکلز، 7 ہزار روپے مالیتی پانی والی موٹر اور 2 عدد ٹرانسفارمر کوئلز مالیتی 67 ہزار روپے شامل ہیں۔ برآمد شدہ سامان کی کل مالیت تقریباً 21 لاکھ 21 ہزار 500 روپے بنتی ہے۔

ڈی پی او طارق عزیز سندھو کا کہنا ہے کہ ملزمان کو ٹھوس شواہد کے ساتھ چالان عدالت کیا جائے گا اور انہیں قرار واقعی سزا دلائی جائے گی۔ انہوں نے واضح کیا کہ سنگین مقدمات میں ملوث افراد کسی رعایت کے مستحق نہیں، شہریوں کی جان و مال کا تحفظ پولیس کی اولین ترجیح ہے۔