دینہ میں الخدمت فاؤنڈیشن کی جانب سے معذور افراد میں ویل چیئرز تقسیم

دینہ: الخدمت فاؤنڈیشن کی جانب سے جی ٹی روڈ دینہ میں ایک پروقار تقریب منعقد کی گئی، جس میں دینہ اور گردونواح سے تعلق رکھنے والے مستحق معذور افراد میں مفت ویل چیئرز تقسیم کی گئیں۔

تقریب کے مہمانِ خصوصی امیر جماعت اسلامی ضلع جہلم ڈاکٹر قاسم محمود چوہدری اور صدر الخدمت فاؤنڈیشن ضلع جہلم حبیب رضا بٹ تھے جبکہ سماجی و کاروباری شخصیات نے بھی بھرپور شرکت کی۔

تقریب سے خطاب کرتے ہوئے ڈاکٹر قاسم محمود چوہدری نے کہا کہ الخدمت فاؤنڈیشن ہر وقت انسانیت کی خدمت کے لیے تیار ہے، چاہے وہ غزہ کے متاثرین کی بحالی ہو، نوجوانوں کے بہتر مستقبل کے منصوبے ہوں یا ناگہانی آفات سے نمٹنے کے اقدامات، الخدمت کے رضاکار ہمیشہ ہر اول دستے کا کردار ادا کرتے ہیں۔

انہوں نے مزید کہا کہ ان شاء اللہ جلد ضلع جہلم میں "بنو قابل” پروگرام سمیت عوامی فلاح و بہبود کے مزید منصوبے شروع کیے جائیں گے، تاکہ دکھی انسانیت کی زیادہ سے زیادہ خدمت یقینی بنائی جا سکے۔