چوری اور ڈکیتی کی وارداتوں میں ملوث عدیلو گینگ کے 2 کارندے گرفتار
سوہاوہ: تھانہ سوہاوہ پولیس نے چوری اور ڈکیتی کی متعدد وارداتوں میں ملوث خطرناک عدیلو گینگ کے دو ملزمان کو گرفتار کر لیا۔ گرفتار ملزمان کی شناخت عدیل اور سلیمان کے نام سے ہوئی ہے۔
ایس ایچ او تھانہ سوہاوہ کی سربراہی میں پولیس ٹیم نے خفیہ اطلاعات پر کامیاب کارروائی کرتے ہوئے دونوں ملزمان کو گرفتار کیا۔ پولیس کے مطابق ملزمان کے قبضے سے 95 ہزار روپے نقدی برآمد کر لی گئی ہے جو کہ مختلف وارداتوں کے دوران لوٹی گئی تھی۔
پولیس حکام کا کہنا ہے کہ گرفتار ملزمان چوری اور ڈکیتی کے متعدد مقدمات میں ملوث ہیں اور انہیں ٹھوس شواہد کے ساتھ عدالت میں چالان کیا جائے گا تاکہ انہیں قرار واقعی سزا دلوائی جا سکے۔ جرائم پیشہ عناصر کے خلاف بلاامتیاز کارروائیاں جاری رہیں گی تاکہ علاقے میں امن و امان کو یقینی بنایا جا سکے۔
ڈی پی او جہلم طارق عزیز سندھو نے سوہاوہ پولیس کی بروقت کارروائی کو سراہتے ہوئے کہا کہ شہریوں کی جان و مال کا تحفظ اولین ترجیح ہے اور جرائم پیشہ عناصر کے لیے کسی قسم کی رعایت نہیں برتی جائے گی۔ انہوں نے مزید کہا کہ پولیس ہر ممکن اقدامات کر رہی ہے تاکہ عوام کو محفوظ ماحول فراہم کیا جا سکے اور جرائم کی بیخ کنی کی جا سکے۔
ہمیں فالو کریں
