بجلی کی طویل بندش، صارفین کا شدید احتجاج

پڑی درویزہ: ایس ڈی او اور دیگر ذمہ داران کو تمغہ حسن کارکردگی کا مستحق قرار دیا جا رہا ہے، جو ’’ڈھوڈہ فیڈر‘‘ کو ایک ہفتے کے دوران دو دو دن تک مکمل بند رکھتے ہیں، صارفین کی ضروریات کو نظر انداز کرتے ہوئے۔

تفصیلات کے مطابق آئیسکو سب ڈویژن خانپور چکوال کے گھریلو اور کمرشل صارفین بجلی کی مسلسل بندش کے باعث شدید پریشان ہیں۔ وضاحت اس طرح دی جا سکتی ہے کہ 10 سے 15 فروری 2025ء تک سرکل چکوال میں ’’ڈھوڈہ فیڈر‘‘ کو ایک دن کے لیے بھی بند نہیں کیا گیا۔

جیسے ہی 17 فروری کا نیا ہفتہ شروع ہوا، پہلے ہی دن 5 گھنٹے بجلی تعمیراتی کام کے نام پر بند رکھی گئی۔ 18 فروری 2025ء کو بھی صبح 9 بجے سے سہ پہر 3:15 بجے تک بجلی معطل رہی، جس سے صارفین کی روزمرہ زندگی بری طرح متاثر ہوئی۔

صارفین کی جانب سے طنزیہ طور پر کہا جا رہا ہے کہ اگر واپڈا افسران کو بجلی کی زائد بندش پر اعزازات دیے جا رہے ہیں، تو ایس ڈی او اور ایکس ای این سب ڈویژن خانپور چکوال ان اعزازات کے مستحق ہیں۔

اس صورت حال کے پیش نظر، صارفین نے چیئرمین آئیسکو طاہر مسعود سے براہ راست مطالبہ کیا ہے کہ وہ اس معاملے کا فوری نوٹس لیں اور سخت ہدایات جاری کریں کہ سب ڈویژن خانپور چکوال کے تمام بجلی فیڈرز کو دورانِ ہفتہ اگر ضرورت ہو تو صرف ایک دن کے لیے معمول کے مطابق بریک ڈاؤن کیا جائے۔ مسلسل دو یا اس سے زائد دن بجلی کی بندش نہ صرف گھریلو صارفین بلکہ کمرشل صارفین کے لیے بھی شدید مشکلات کا باعث بنتی ہے۔