سردیوں میں بیماریوں سے بچاؤ کے لئے احتیاطی تدابیر ضروری ہے، ڈاکٹر ملک حفیظ الرحمٰن

جہلم: ڈاکٹر ملک حفیظ الرحمٰن نے کہا ہے کہ سردیوں کا موسم مختلف بیماریوں کا سبب بنتا ہے جو ہمارے جسم کے دفاعی نظام کو متاثر کرتی ہیں۔

ڈسٹرکٹ ہیڈکواٹر اسپتال جہلم کے شعبہ ٹی بی و تپ دق کے سابق انچارج چیسٹ فزیشن ڈاکٹر ملک حفیظ الرحمٰن نے اپنے ایک بیان میں کہا کہ سردیوں میں درجہ حرارت میں کمی کی وجہ سے سانس کی نالی کی بیماریاں، جیسے نزلہ، زکام، اور کھانسی عام ہو جاتی ہیں۔ اس کے علاوہ، انفلوئنزا (فلو) اور نمونیا بھی سردیوں میں تیزی سے پھیلتے ہیں۔

انہوں نے کہا کہ سردی کے موسم میں جلد کی خشکی اور چمڑی کے مسائل بھی بڑھ جاتے ہیں، خاص طور پر سرد ہوا اور کم نمی کی وجہ سے۔ مزید برآں، بچوں اور بزرگوں میں جوڑوں کا درد، گنٹھیا اور دیگر موسمی تکالیف میں بھی اضافہ ہو سکتا ہے۔ ان بیماریوں سے بچاؤ کے لئے مناسب لباس، گرمائش، اور ٹھنڈی تیز ہواوں سے بچنا ضروری ہے۔

ڈاکٹر ملک حفیظ الرحمٰن نے کہا کہ صاف ستھرا پانی پینا، وٹامن ڈی کی کمی کو دور کرنا اور صحت مند غذا کا استعمال کرنا ان بیماریوں سے بچاؤ میں مددگار ثابت ہو سکتا ہے۔