برمنگھم میں عید ملن تقریب، پوٹھوہاری تہذیب ثقافت و زبان کے فروغ اور مسائل کے حل کیلئے تنظیم کا قیام

برمنگھم: زندہ قومیں اپنے کلچر و ثقافت کے ساتھ نہ صرف جڑی رہتی ہیں بلکہ اس کو اجاگر کرنے کے لیے سرگرم بھی رہتی ہیں ایسے ہی برمنگھم کے نواحی علاقہ سٹوربرج (Stourbridge)میں بزم پوٹھوہاراینڈ کشمیر گروپ ون کے زیر اہتمام عید ملن پارٹی کا انعقاد کیا گیا ۔

تقریب میں میں خطہ پوٹھوہار اور آزادکشمیر سے برطانیہ میں آباد مخلتف شعبہ ہائے زندگی سے تعلق رکھنے والے افراد نے کثیر تعداد میں شرکت کرکے اپنی تہذیب و ثقافت اوروطن سےمحبت کا اظہار کیا۔ پروگرام کا باقاعدہ آغاز تلاوت قرآن پاک اور نعت رسول مقبول سے ہوا۔اسٹیج سیکرٹری کے فرائض راجہ لیاقت حسین نے احسن طریقہ سے سرانجام دیے۔

اس دوران پوٹھوہاری زبان میں شعر وشاعری بھی کی گئی جبکہ تنظیم کے سربراہ ملک اشفاق،چو ہدری شاہ جہان ،ملک آفتاب سرمد،ملک ارشد،چو ہدری اشتیاق، عابد حسین اور دیگر نے خطابات کرتے ہوئے کہا کہ پوٹھوہاری جہاں بھی ہوں اپنی زندگی میں مذاق، کھیل، اور تفریح کا بھی خصوصی مقام رکھتےہیں۔ مختلف موسموں میں میلے اور تہوارات منائے جاتے ہیں جو ان کی زندگی میں رنگ بھرتے ہیں۔ آج ہم اس کھلی جگہ پر اسی وجہ سے ایک چھت کے نیچے جمع ہوئے ہیں۔

اس موقع پر برطانیہ میں مقیم خطہ پوٹھوہار سے تعلق رکھنے والے افراد کو پاکستان اور برطانیہ میں درپیش مسائل کے حل کے لیے ایک نئی فلاحی تنظیم کے قیام کا اعلان بھی کیا گیا۔ جس کا ایک مقصد برطانیہ میں خطہ پوٹھوہار کی تہذیب وثقافت اور زبان کا فروغ ہے اور درپیش مسائل کا حل تلاش کرنا ہے۔

خطہ پوٹھوار کی ثقافت ، روایات اور زبان سے برٹش پاکستانی بچے بھی بہت پیار کرتے ہیں اس زبان کی وجہ سے نئی نسل کا اپنے ملک اور کلچر کے ساتھ لگاو بڑھ رہا ہے۔ یہاں کے لوگ اپنی زندگی کو مختلف رنگوں میں رنگتے ہیں۔ پوٹھوہاری لوگ اپنے خوابوں کو پورا کرنے اور ان کی ترقی اور خوشی کو محفوظ کرنے کے لیے محبت اور اتحاد واتفاق کوعظیم اہمیت دیتے ہیں۔ پوٹھوہار کے لوگ محنت کرکے اپنے خاندانوں کو سپورٹ فراہم کرتے ہیں۔

اس موقع پر منتظمین ملک آفتاب سرمد،ملک ارشد ،عابد حسین ،راجہ لیاقت حسین اور دیگر نے میڈیا سے گفتگو کرتے ہوئے کہا کہ آج کی عید ملن پارٹی کا مقصد خطہ پوٹھوہار کے باسیوں کو ایک چھتری کے نیچے جمع کرنا تھا تاکہ اجتماعی طور پر اپنی زبان اور کلچر کے ساتھ نئی نسلوں کو جوڑے رکھیں۔

آخر میں منتظمین کی طرف سے پر تکلف کھانے کے ساتھ شرکاء کا شکریہ بھی ادا کیا گیا۔ شرکاء کا کہنا ہے کہ برطانیہ میں آباد پوٹھوہار کے لوگوں کے مسائل کے حل کیلئے باہمی اتحاد واتفاق کی اشد ضرورت تھی آج کی محفل اس کیلئے کارآمد ثابت ہو سکتی ہے۔