جادہ کے محلہ چوہدریاں میں سیوریج کا نظام ناکام، پانی کی نکاسی نہ ہونے پر علاقہ مکینوں کا شدید احتجاج

جہلم: محلہ جامع مسجد صدیق اکبر چوہدریاں جادہ میں گندے پانی کی نکاسی نہ ہونے کے باعث علاقہ مکین شدید مشکلات کا شکار ہو گئے ہیں، جہاں گلیوں میں جمع سیوریج کا پانی جوہڑ کی شکل اختیار کر چکا ہے۔

اہلِ علاقہ کے مطابق گزشتہ عرصہ دراز سے تقریباً 200 گھروں کا استعمال شدہ پانی اور بارش کا پانی ایک ہی مقام پر جمع ہو رہا ہے، تاہم نکاسی کے لیے کوئی مؤثر انتظام نہیں کیا گیا۔ مقامی افراد کا کہنا ہے کہ پہلے یہ پانی نزدیکی ہسپتال کی کالونی سے گزر کر مشرقی سمت میں بہہ جاتا تھا، لیکن نالہ بند ہونے کے بعد صورتحال مزید سنگین ہو گئی ہے۔

مکینوں نے شکایت کی کہ گلیوں میں کھڑا گندا پانی نہ صرف آمدورفت میں شدید رکاوٹ بن رہا ہے بلکہ تعفن اور بدبو کے باعث سانس لینا بھی دشوار ہو گیا ہے۔ انہوں نے خدشہ ظاہر کیا کہ اس صورتحال کے باعث مختلف وبائی اور جلدی امراض پھیلنے کا خطرہ بڑھ گیا ہے۔

اہلِ علاقہ کے نمایاں افراد قاضی ضیاء الحق، مظہر حسین اصف، قاری محمد احمد خالد اور محمد قاسم ضیا نے مشترکہ طور پر ڈپٹی کمشنر جہلم سے مطالبہ کیا ہے کہ نکاسی آب کے اس سنگین مسئلے کا فوری نوٹس لے کر سیوریج نظام کی بہتری کے لیے ہنگامی بنیادوں پر اقدامات کیے جائیں۔

مکینوں نے خبردار کیا ہے کہ اگر مسئلہ فوری حل نہ کیا گیا تو احتجاج کا دائرہ مزید وسیع کیا جائے گا۔