جہلم میں پیرا فورس کا تجاوزات کے خلاف کریک ڈاؤن، سڑکوں پر کھڑی متعدد ریڑیاں سیل
جہلم: ڈپٹی کمشنر جہلم میر رضا اوزگن کی ہدایت پر پیرا فورس نے شہر بھر میں تجاوزات کے خلاف بھرپور کارروائی کرتے ہوئے سڑکوں پر غیر قانونی طور پر کھڑی ریڑیوں کے خلاف کریک ڈاؤن کیا۔ کارروائی کے دوران ٹریفک کی روانی میں خلل ڈالنے والی متعدد ریڑیاں سیل کر دی گئیں۔
ترجمان ضلعی انتظامیہ کے مطابق پیرا فورس نے شہر کے مصروف تجارتی مراکز اور اہم شاہراہوں کا معائنہ کیا جہاں ریڑھی بانوں نے سڑکوں کے کنارے ناجائز تجاوزات قائم کر رکھی تھیں۔ ڈپٹی کمشنر کی ہدایت پر ان ریڑیوں کو قبضے میں لے کر سیل کر دیا گیا۔
ڈپٹی کمشنر جہلم میر رضا اوزگن نے متعلقہ افسران کو ہدایت کی کہ تجاوزات کے خلاف بلا امتیاز کارروائی جاری رکھی جائے اور سڑکوں پر دوبارہ ریڑیاں لگانے والوں کے خلاف سخت قانونی کارروائی عمل میں لائی جائے۔
انہوں نے مزید کہا کہ شہریوں کو ٹریفک کے مسائل سے نجات دلانے اور آمدورفت میں آسانی فراہم کرنے کے لیے سڑکوں کے کناروں سے تجاوزات کا خاتمہ ناگزیر ہے۔ وزیر اعلیٰ پنجاب کے مشن کے تحت تجاوزات کرنے والوں کے خلاف بلا امتیاز کارروائی جاری رہے گی اور عوامی مفاد کے راستوں میں کسی قسم کی رکاوٹ برداشت نہیں کی جائے گی۔
شہریوں نے تجاوزات کے خلاف پیرا فورس کے اس متحرک کردار کو سراہتے ہوئے امید ظاہر کی ہے کہ اس طرح کی کارروائیوں سے شہر میں ٹریفک کی روانی بہتر ہوگی۔
