دینہ میں چیک ڈس آنر کے مقدمات میں مطلوب 2 اشتہاری مجرمان گرفتار

دینہ: پولیس نے مختلف کارروائیوں کے دوران چیک ڈس آنر کے مقدمات میں مطلوب دو اشتہاری ملزمان کو گرفتار کر لیا۔

تفصیلات کے مطابق جہلم کی تحصیل دینہ میں سرمد ملک ایس ایچ او تھانہ دینہ نے اپنی ٹیم کے ہمراہ اسنیپ چیکنگ کے دوران کارروائی کرتے ہوئے ایک اشتہاری مجرم کو گرفتار کیا، جو ضلع قصور پولیس کو چیک ڈس آنر کے مقدمہ میں مطلوب تھا۔

دوسری جانب ایس ایچ او تھانہ منگلا کینٹ نے اپنی ٹیم کے ہمراہ کارروائی کرتے ہوئے سال 2024 سے بوگس چیک کے مقدمہ میں مطلوب اشتہاری ملزم کو گرفتار کر لیا، جو گرفتاری سے بچنے کے لیے روپوش تھا۔ پولیس نے جدید سائنٹیفک طریقہ کار کو بروئے کار لاتے ہوئے ملزم کو ٹریس کر کے گرفتار کر لیا۔

ڈسٹرکٹ پولیس آفیسر جہلم شفیق احمد چوہدری نے کہا ہے کہ اشتہاری مجرمان اور قانون شکن عناصر کے خلاف بلا امتیاز کارروائیاں جاری رہیں گی تاکہ شہریوں کے جان و مال کا تحفظ یقینی بنایا جا سکے۔