جہلم سمیت ملک بھر میں عید میلاد النبی ﷺ کی تیاریاں زور و شور سے جاری
جہلم سمیت ملک بھر میں عید میلاد النبی ﷺ کی تیاریاں زور و شور سے جاری ہیں۔ عید میلاد النبی ﷺ قریب آتے ہی گھروں، بازاروں اور سڑکوں پر رنگ برنگے قمقموں اور چائنہ لائٹس کی روشنیوں نے ہر طرف خوبصورتی اور عقیدت کا سماں باندھ دیا ہے۔
سوشل میڈیا پر بھی نبی اکرم صلی اللہ علیہ وسلم کی شان میں نعتیں اور درود و سلام گونج رہے ہیں جو نبی کریم ﷺ کی سیرت اور تعلیمات کی عکاسی کر رہے ہیں۔ جدید ڈیجیٹل دور میں سوشل میڈیا محبتِ رسول ﷺ کے اظہار، کمیونٹیز کو جوڑنے اور اتحاد کے جذبے کو فروغ دینے کے لیے ایک مؤثر پلیٹ فارم بن گیا ہے۔
سرکاری و نجی دفاتر اور تعلیمی اداروں میں محافلِ نعت کا اہتمام کیا جا رہا ہے، جہاں طلباء و طالبات تلاوت اور نعت خوانی کے مقابلوں میں جوش و خروش سے حصہ لے رہے ہیں۔ بچوں کا یہ جذبہ محبتِ رسول ﷺ کی عملی عکاسی کرتا ہے۔
خواتین گھروں میں خصوصی پکوان تیار کرنے اور اپنے جذبات کو سوشل میڈیا پر شیئر کر کے عقیدت کا اظہار کر رہی ہیں۔ اسی طرح کاروباری طبقہ بھی اس موقع پر بڑھتی ہوئی مانگ کے حوالے سے اپنے تجربات سوشل میڈیا پر بیان کر رہا ہے۔
عید میلاد النبی ﷺ کے اس روح پرور موقع پر آن لائن اور آف لائن تقریبات کا فرق ختم ہو گیا ہے، ہر جگہ عشقِ رسول ﷺ کے چرچے اور خوشی کی فضا نمایاں ہے۔
