موسم کی تبدیلی اور سموگ کے باعث نزلہ زکام میں اضافہ، ڈاکٹرز کی شہریوں کو حفاظتی تدابیر اپنانے کی ہدایت

جہلم میں بدلتے موسم کی خنکی اور بڑھتی سموگ کے باعث شہریوں میں نزلہ، زکام اور کھانسی جیسے امراض میں اضافہ ہو گیا۔

تفصیلات کے مطابق موسم سرما کی آمد کے ساتھ ہی فضا میں نمی اور آلودگی بڑھنے لگی ہے جس کے نتیجے میں ہر تیسرے شخص کو سانس اور نزلہ زکام کی شکایات لاحق ہیں۔ ان مریضوں میں بچوں، بوڑھوں اور خواتین کی تعداد نمایاں ہے۔

شہر کے اسپتالوں اور میڈیکل اسٹورز پر نزلہ زکام اور بخار کی ادویات لینے والوں کا رش بڑھ گیا ہے۔ ڈاکٹرز شہریوں کو نہ صرف ادویات تجویز کر رہے ہیں بلکہ موسمی تبدیلی اور فضائی آلودگی سے بچاؤ کے لیے حفاظتی تدابیر اختیار کرنے کی بھی تاکید کر رہے ہیں۔

ڈاکٹرز کا کہنا ہے کہ شہری باہر جاتے وقت ماسک کا استعمال کریں، گرم مشروبات کا استعمال بڑھائیں، غیر ضروری طور پر کھلی فضا میں نہ گھومیں اور بچوں کو خاص طور پر سموگ سے محفوظ رکھیں۔ انہوں نے مزید کہا کہ موسم کی شدت میں اضافے کے ساتھ احتیاطی تدابیر اپنانا ہی بیماریوں سے بچاؤ کا بہترین ذریعہ ہے۔