سویڈن میں پاکستانی کمیونٹی کے مسائل سے آگاہ ہیں، سیدہ وردہ بی بی
مالمو: ڈپٹی ہیڈ آف مشن پاکستان سیدہ وردہ بی بی نے مالمو شہر کا دورہ کیا جہاں انہوں نے مختلف مکتبہ فکر سے تعلق رکھنے والی کمیونٹی شخصیات سے ملاقاتیں کرکے کمیونٹی مسائل پر تبادلہ خیالات کیا۔
میتلا ہاؤس میں کمیونٹی بیٹھک میں خطاب کرتے ہوئے ڈپٹی ہیڈ آف مشن پاکستان کا کہنا تھاکہ پاکستانی کمیونٹی کے مسائل سے باخوبی واقف ہیں ہمارے دن کا آغاز اور اختتام کمیونٹی کے اہم مسائل کے حل پر ہی ہوتا ہے۔ بینک ٹرانسفر ،ویزوں کا اجرا اور پاکستان میں قائم سویڈش سفارتخانے کے حوالے سے ہمارا عملہ شب وروز کاوشیں کررہا ہے۔
ڈپٹی ہیڈ آف مشن پاکستان نے کمیونٹی رہنماؤں سے درخواست کی کہ بطور سویڈش شہری آپ بھی سویڈش حکومت سے ان معاملات کے حل کے حوالے سے درخواست کریں۔
سیدہ وردہ بی بی نے جمسا ہاؤس میں عید ملن پارٹی میں بھی شرکت کی جہاں انہوں نے پاکستانی کمیونٹی کے ڈاکٹرز، فزیوتھراپسٹ اور آئی ٹی کے شعبے سے منسلک ماہرین سے ملاقات کی۔
سیدہ وردہ نے مالمو شہر میں قائم پاکستانی کمیونٹی کے مذہبی مرکز کے دورے کے دوران پاکستانی کمیونٹی کی سویڈن میں دینی خدمات کو بھی سراہا۔ کاروباری شخصیت راجہ عاطف شہزاد کی جانب سے ڈپٹی ہیڈآف مشن کے اعزاز میں مقامی ریسٹورنٹ میں عشائیہ کا اہتمام بھی کیا گیا۔
