محکمہ موسمیات نے 11 اور 12 جولائی کو جہلم سمیت پنجاب میں بارشوں کی پیش گوئی کر دی

جہلم: محکمہ موسمیات نے 11 اور 12 جولائی کے دوران ضلع جہلم سمیت پنجاب کے مختلف اضلاع میں بارشوں کی پیش گوئی کرتے ہوئے متعلقہ اداروں کو الرٹ رہنے اور شہریوں کو احتیاطی تدابیر اختیار کرنے کی ہدایت جاری کر دی ہے۔

محکمہ موسمیات کا کہنا ہے کہ مون سون ہواؤں کے مؤثر نظام کے باعث 11 اور 12 جولائی کے دوران جہلم سمیت پنجاب کے مختلف علاقوں میں کہیں ہلکی، کہیں درمیانی جبکہ بعض مقامات پر تیز بارش کا امکان ہے۔ بارشوں کے نتیجے میں موسم خوشگوار ہونے کی توقع ہے، تاہم بعض نشیبی علاقوں میں پانی جمع ہونے اور مقامی ندی نالوں میں پانی کے بہاؤ میں اضافے کا خدشہ بھی ظاہر کیا گیا ہے۔

محکمہ موسمیات کی پیش گوئی کے بعد ضلعی انتظامیہ اور متعلقہ اداروں کو ممکنہ صورتحال سے نمٹنے کے لیے پیشگی انتظامات مکمل رکھنے کی ہدایت کی گئی ہے تاکہ کسی بھی ہنگامی صورتحال میں بروقت کارروائی یقینی بنائی جا سکے۔

شہریوں سے اپیل کی گئی ہے کہ بارش کے دوران غیر ضروری سفر سے گریز کریں، بجلی کی کھلی تاروں، برساتی نالوں اور نشیبی علاقوں کے قریب جانے سے احتیاط برتیں اور خراب موسم کے دوران حفاظتی تدابیر اختیار کریں تاکہ کسی بھی ناخوشگوار واقعے سے محفوظ رہا جا سکے۔