علمائے کرام امت مسلمہ کے وسیع تر مفاد کیلئے کام کریں، ڈاکٹر ساجد الرحمٰن
مانچسٹر: علمائے اہل سنت اتحاد امت مسلمہ کے وسیع تر مفاد کیلئے کام کریں۔ رسول رحمتﷺ کی تعلیمات کو عام کیا جائے۔
ان خیالات کا اظہار قادریہ جیلانیہ اسلامک سنٹر لانگ سائیڈمانچسٹر میں مرکزی جماعت اہلسنت برطانیہ و یورپ کی عیدملن اور مفتی برطانیہ علامہ فضل احمد قادری کی کتاب مقالات قادریہ کی تقریب رونمائی کے موقع پر پاکستان کے دینی و روحانی اسکالرز پروفیسر ڈاکٹر ساجد الرحمن سجادہ نشین بگھار شریف نے خطاب کرتے ہوئے کیا۔
انہوں نے علمائے اہل سنت سے متحد ہو نے کی اپیل کی اور برطانیہ بھر کے علماء کرام کو ایک پلیٹ فارم پر جمع ہو کر عالمی فتنوں اور امت مسلمہ کے خلاف سازشوں اور قرآن وسنت کی بالادستی کیلئے کام کرنے پر زور دیا۔ انھوں نے مرحوم مفکر ملت علامہ احمد نثار بیگ قادریؒ کی دینی خدمات کو شاندار الفاظ میں خراج عقیدت پیش۔
تقریب کے موقع پر برطانیہ بھر سے مرکزی جماعت اہلسنت برطانیہ و یورپ کے ذمہ داران و عہدیداران کے علاوہ کثیر تعداد میں اہلسنت کی تنظیمات کے علماء و مشائخ شریک ہوئے۔ محفل کا آغاز تلاوت کلام پاک سے ہوا، نعت رسول مقبول ﷺپیش کی گئی۔
اس موقع پر کتاب مقالات قادری کا مختصر تعارف پیش کیا گیا ،مفتی برطانیہ حافظ فضل احمد قادری نے تفصیلی روشنی ڈالی۔ محققِ برطانیہ علامہ ظفر محمود فراشوی صدر مرکزی جماعت اہلسنت برطانیہ و یورپ نے یوکے، کے مسائل پر گفتگو کی۔ صدر جماعت علامہ حافظ ظہیر احمد نقشبندی صدر مرکزی جماعت اہلسنت برطانیہ و یورپ نے مہمانانِ کا شکریہ ادا کیا۔
آخر میں مفسرقرآن علامہ قاضی محمد عبداللطیف قادری نے امت مسلمہ ، غزہ و فلسطین اور مقبوضہ کشمیر کے مسلمانوں اور مفکرِ ملت مناظر اسلام علامہ احمد نثار بیگ قادریؒ کے بلند درجات کیلئے دعا کی۔
اسلامک سنٹر لانگ سائیڈمانچسٹر کے سربراہ عیدملن کے منتظم اعلیٰ صاحبزادہ احمد وقار بیگ قادری نے کہاکہ علمائے اہل سنت برطانیہ یورپ میں نوجوان نسل کی اصلاح اور دینی رہنمائی کیلئے کوشاں ہیں۔
صدر مرکزی جماعت اہلسنت برطانیہ و یورپ مفتی محمد اختر قادری، مفتی ڈاکٹر مصطفیٰ رضا قادری ،علامہ عمر حیات قادری، محقق برطانیہ علامہ ظفر محمود مجددی فراشوی، صاحبزادہ محمد سجاد رضوی، مولانا صدق کوثر، مولانا قاری محمد بشیر، حافظ امجد محمودبگھاروی، قاری ارشد محمود بگھاروی،استاد محمد صفدر ،فاروق چیمہ، محمد اشرف گجر، حافظ نعمان قاضی محفل میں شریک تھے۔
