بینک صارفین کے لیے اچھی خبر سامنے آ گئی

بینکنگ محتسب پاکستان نے بینک کی جانب سے بینک صارفین کی شکایات حل کرنے کی مدت میں 15 دن کی کمی کردی۔

تفصیلات کے مطابق بینک صارفین کی شکایات کو رفع کرنے کی مدت تیس دن مقرّر کردی گئی ہے۔

ترجمان بینکنگ محتسب کے مطابق اس سے قبل شکایت کنندگان کی شکایات کا حل بینکنگ کمپنیز آرڈیننس، 1962کے تحت بینکوں کو 45 دن میں کرنا ہوتا تھا، جسے کم کر کے 30 دن کر دیا گیا ہے۔

بینک صارف بینک کے جواب سے مطمئن نہ ہونے کی صورت میں 30 دن کے اندر اندر اپنی شکایات کے ازالے کے لیے بینکنگ محتسب پاکستان سے رجوع کر سکتے ہیں۔

بینکنگ کمپنیز آرڈیننس، 1962سیکشن (D) 82 کی ذیلی دفعہ (2) میں کی گئی ترمیم مندرجہ ذیل ہے۔

شکایت کرنے سے پہلے، شکایت کنندہ متعلقہ بینکنگ کمپنی سے اپنی شکایت کا ازالہ کرنے کی درخواست کرے گا۔

اگر بینکنگ کمپنی جواب دینے میں ناکام رہتی ہے یا تیس دن کے اندر شکایت کنندہ کو غیر تسلی بخش جواب دیتی ہے، شکایت کنندہ بینک کے خلاف کسی بھی وقت تیس دن کی مدّت کے اندر شکایت درج کرا سکتا ہے۔

بصورتِ دیگر بینکنگ محتسب اگر مطمئن ہو کہ شکایت درج کرنے میں تاخیر کی وجوہات معقول ہیں، تو تاخیر کو درگزر کرکے شکایت پر غور کیا جاسکتا ہے۔