جہلم پولیس کی گورنمنٹ گریجویٹ کالج اور پاکستان ٹوبیکو کمپنی میں موک ایکسرسائز
جہلم: ڈسٹرکٹ پولیس آفیسر جہلم شفیق احمد چوہدری کی ہدایت پر ایس ڈی پی او صدر سرکل اور ان کی ٹیم کی جانب سے گورنمنٹ گریجویٹ کالج جی ٹی روڈ جہلم اور پاکستان ٹوبیکو کمپنی میں موک ایکسرسائز کا انعقاد کیا گیا۔
اس موک ایکسرسائز کا مقصد ضلع جہلم میں امن و امان کی صورتحال کو مزید مضبوط بنانا اور ہنگامی حالات میں پولیس کی پیشہ ورانہ صلاحیتوں کو جانچنا تھا۔ اس موقع پر ایس ڈی پی او صدر سرکل، ایس ایچ او تھانہ کالا گجراں، ایلیٹ فورس، ریسکیو 1122، بم ڈسپوزل اسکواڈ، ٹریفک پولیس اور دیگر متعلقہ اداروں نے بھرپور شرکت کی۔
موک ایکسرسائز کے دوران ممکنہ دہشت گردی کے خطرے کی صورت میں تعلیمی ادارے کی عمارت کا مکمل حفاظتی معائنہ کیا گیا جبکہ مشتبہ افراد کی نقل و حرکت پر فوری رسپانس کا عملی مظاہرہ بھی کیا گیا۔ ایلیٹ فورس نے ریپڈ ایکشن اور عمارت کے کلیئرنس آپریشن کی مشق کی جبکہ ریسکیو 1122 کی ٹیموں نے زخمیوں کی فوری منتقلی اور طبی امداد کی عملی مشق کا مظاہرہ کیا۔
اسی طرح بم ڈسپوزل اسکواڈ نے حفاظتی سوئپ اور سرچ آپریشن کیا جبکہ ٹریفک پولیس نے ایمرجنسی روٹس کی ڈائیورشن اور ٹریفک مینجمنٹ کا عملی مظاہرہ بھی کیا۔
ڈی پی او جہلم شفیق احمد چوہدری کا کہنا ہے کہ امن و امان کا قیام جہلم پولیس کی اولین ترجیح ہے۔ اس طرح کی فرضی مشقیں پولیس فورس کی پیشہ ورانہ مہارت کو بہتر بناتی ہیں اور کسی بھی ہنگامی صورتحال میں بروقت اور مؤثر کارروائی کو یقینی بناتی ہیں۔ انہوں نے کہا کہ شہریوں کے جان و مال کا تحفظ ہر صورت یقینی بنایا جائے گا۔
