سوہاوہ میں دن دیہاڑے گھر سے لاکھوں روپے اور طلائی زیورات چوری، سی سی ٹی وی فوٹیج سامنے آ گئی
سوہاوہ کے محلہ مغلاں میں دن دیہاڑے گھر سے لاکھوں روپے نقدی اور طلائی زیورات چوری ہونے کی واردات نے شہریوں میں تشویش کی لہر دوڑا دی۔ واردات کی مبینہ سی سی ٹی وی فوٹیج بھی سامنے آ گئی ہے، جس میں چند خواتین کو گھر میں داخل ہوتے اور بعد ازاں واپس جاتے ہوئے دیکھا جا سکتا ہے۔
متاثرہ خاندان کے مطابق واقعہ آج صبح تقریباً 7 بجے پیش آیا، جب گھر کے افراد سو رہے تھے۔ اسی دوران مبینہ طور پر چند خواتین گھر میں داخل ہوئیں اور اہلِ خانہ کے سوئے ہونے کا فائدہ اٹھاتے ہوئے ایک کمرے سے بیگ اٹھا کر فرار ہو گئیں۔
متاثرہ خاندان کا کہنا ہے کہ بیگ میں لاکھوں روپے نقدی اور قیمتی طلائی زیورات موجود تھے، جس کے باعث انہیں بھاری مالی نقصان کا سامنا کرنا پڑا۔
واقعے کی سی سی ٹی وی فوٹیج بھی موجود ہے، جس میں مبینہ طور پر خواتین کو گھر میں داخل ہوتے اور واپس جاتے ہوئے دیکھا جا سکتا ہے۔ متاثرہ خاندان کے مطابق واقعے کے بعد جب وہ قانونی کارروائی اور رپورٹ کے لیے تھانہ سوہاوہ پہنچے تو مبینہ طور پر انہیں خود خواتین کو تلاش کرنے کا مشورہ دیا گیا۔
شہریوں نے اس مبینہ رویے پر تشویش کا اظہار کرتے ہوئے سوال اٹھایا ہے کہ اگر واردات کی سی سی ٹی وی فوٹیج موجود ہے تو ملزمان کی شناخت اور تلاش کی ذمہ داری متاثرہ شہریوں کے بجائے پولیس کی کیوں نہیں؟
سوہاوہ کے شہریوں نے ڈی پی او جہلم شفیق احمد چوہدری سے واقعے کا فوری نوٹس لینے کا مطالبہ کرتے ہوئے کہا ہے کہ سی سی ٹی وی فوٹیج کی مدد سے مبینہ ملزمان کی شناخت، گرفتاری اور چوری شدہ رقم و زیورات کی برآمدگی کے لیے مؤثر کارروائی کی جائے۔
شہریوں نے مزید مطالبہ کیا کہ سوہاوہ شہر اور گردونواح میں مشکوک افراد اور گروہوں کی سرگرمیوں پر کڑی نظر رکھی جائے اور قانون کے دائرے میں رہتے ہوئے جرائم کی روک تھام کے لیے پولیس گشت اور نگرانی کا نظام مزید مؤثر بنایا جائے۔
