مکہ مکرمہ میں شدید بارشیں، عمرہ زائرین کیلئے گائیڈ لائنز جاری
مکہ مکرمہ: سعودی عرب نے مکہ مکرمہ میں شدید بارشوں کے باعث عمرہ زائرین کے لیے گائیڈ لائنز جاری کردیں۔
گلف نیوز کے مطابق سعودی حکام نے عمرہ یا زیارت کرنے کا ارادہ رکھنے والے مسلمانوں کو مشورہ دیا ہے کہ وہ بارش کے دوران حفاظت کو یقینی بنانے کے لیے کچھ اقدامات پر عمل کریں۔
اس سلسلے میں وزارت حج و عمرہ نے مسجد الحرام میں عمرہ کی ادائیگی کے دوران نمازیوں کے لیے بارش کے دوران حفاظتی ہدایات جاری کی ہیں، جن میں ہجوم والی جگہوں سے گریز کرنے، دوسروں کے ساتھ گھومنے پھرنے، ایسکلیٹرز اور راہداریوں کا استعمال کرتے وقت محتاط رہنے اور وسیع و عریض جگہ پر سکیورٹی اہلکاروں کی ہدایات پر عمل کرنے کا کہا گیا ہے۔
بتایا گیا ہے کہ پیر کی رات نمازیوں کو زبردست بارش کے درمیان مسجدالحرام میں عشاء کی نماز ادا کرتے ہوئے دیکھا گیا، بارش موسلادھار ہونے کے باوجود نمازی اور عمرہ زائرین مسجد الحرام کے صحن میں عبادت میں مشغول رہے، اس دوران مکہ مکرمہ میں تیز ہواؤں اور گرج چمک کے ساتھ موسلادھار بارش ہوئی جس کے نتیجے میں شہر کی متعدد سڑکیں زیر آب آگئیں، جس پر مکہ مکرمہ سمیت مملکت کے دیگر علاقوں میں طوفانی بارشوں کے امکان کے پیش نظر سعودی ہلال احمر کو ہائی الرٹ کر دیا گیا ۔
سعودی ہلال احمر کے حکام کا کہنا ہے کہ کمانڈ اینڈ کنٹرول سینٹر، تمام ایمرجنسی مراکز اور خصوصی رسپانس ٹیمیں بارش کے اثرات سے نمٹنے کےلیے پوری طرح تیار ہیں، سعودی ہلال احمر نے مکہ ریجن میں موجود 98 مراکز میں ڈاکٹروں، ماہرین، ایمرجنسی میڈیسن، ایمبولینس ٹیکنیشنز کی ٹیمیں تعینات کی ہیں۔
مجموعی طور پر ایک ہزار 420 سروس پرووائیڈر ہیں جن میں ایمبولینس اور ڈیزاسٹررسپانس گاڑیوں سمیت تقریبا 149 گاڑیاں شامل ہیں جب کہ اضافی مدد فراہم کرنے کےلیے ایک ایئر ایمبولینس بھی دستیاب ہے، شہری اور مقیم غیرملکی متعلقہ حکام کی ہدایات پر عمل کریں، خراب موسم کے دوران احتیاطی سے کام لیں، ٹریفک سیفٹی قوانین پر عمل کریں، ندی نالوں اور نشیبی مقامات سے دور رہیں۔
تازہ ترین خبروں کیلئے ہمیں گوگل نیوز پر فالو کریں
