سیلابی صورتحال میں جہلم کے شہریوں کی حفاظت ہر صورت یقینی بنائی جائے گی، بلال اظہر کیانی

دینہ/ سوہاوہ: چیئرمین قومی پارلیمانی ٹاسک فورس و ممبر قومی اسمبلی بلال اظہر کیانی نے سوہاوہ کے علاقہ ڈومیلی میں شدید بارشوں کے باعث پرائیوٹ ڈیم کا بند ٹوٹنے پر متاثرہ ڈیم اور دیگر ملحقہ علاقوں کا دورہ کیا۔

پاکستان مسلم لیگ (ن) کے مرکزی رہنما بلال اظہر کیانی نے متاثرہ ڈیم اور علاقوں کا دورہ کر کے ریلیف کے کاموں اور نکاسی آب کی صورتحال کا جائزہ لیا۔ انہوں نے بارش سے متاثرین سے بھی ملاقات کی اور ان کو حکومت کی جانب سے ہر طرح کی سپورٹ کی یقین دہانی کروائی۔

اس موقع پر بلال اظہر کیانی نے کہا کہ بارشوں سے کسانوں اور عام افراد کو ہونے والے نقصان کا احساس ہے، مشکل کی اس گھڑی میں ہم سب متاثرین کے شانہ بشانہ ہیں۔ سیلابی صورتحال میں رہائشیوں کی حفاظت ہر صورت یقینی بنائی جائے گی۔ حفاظتی کیمپوں میں تمام سہولیات فراہم کی جائیں گی اور نقصانات کا ازالہ ہو گا۔

بلال اظہر کیانی نے محکمہ آبپاشی کے عملے اور ریسکیو اداروں کو الرٹ رہنے جبکہ انتظامیہ کو حفاظتی بند کی مرمت جلد مکمل کرنے کی ہدایت کی۔

بعد ازاں بلال اظہر کیانی نے جھنگ کھوکھراں، مل کھوکھراں اور بھگوالہ کا دورہ کیا اور حالیہ بارشوں سے متاثرہ گھروں اور سڑکوں کا تفصیلی جائزہ لیا۔

ضلعی انتظامیہ نے بارشوں سے ہونے والے نقصانات اور متاثرین کو ریلیف فراہم کرنے کے حوالے سے اٹھائے گئے اقدامات پر بلال اظہر کیانی کو بریفنگ دی۔ بلال اظہر کیانی نے بارشوں سے متاثرہ علاقہ مکینوں سے بھی ملاقات کی اور ساتھ ہی ساتھ انتظامیہ کو ہر ممکن سہولت اور مدد فراہم کرنے کی ہدایت کی۔

تازہ ترین خبروں کیلئے ہمیں گوگل نیوز پر فالو کریں