پنڈدادنخان مین بازار کی بیوٹیفکیشن عوام اور تاجروں کیلئے دردِ سر بن گئی

پنڈدادنخان: بازار میں جاری بیوٹیفکیشن منصوبہ شہریوں اور تاجروں کیلئے شدید مشکلات کا باعث بن گیا، جبکہ عوامی پریشانیاں ختم ہونے کا نام نہیں لے رہیں۔

شہریوں کے مطابق صبح 10 بجتے ہی ٹھیکیدار کی جانب سے پورے بازار میں مٹی پھیلا دی جاتی ہے، جس کے باعث کاروباری سرگرمیاں شدید متاثر ہو رہی ہیں۔ لوگوں کا کہنا ہے کہ کبھی بنیڑوں کی تعمیر کی جاتی ہے اور پھر انہیں دوبارہ توڑ دیا جاتا ہے، جس سے ناقص منصوبہ بندی واضح نظر آتی ہے۔

تاجروں نے شکایت کی کہ جس کام کو رات کے اوقات میں مکمل کیا جانا چاہیے، وہ دن دیہاڑے کیا جا رہا ہے، جس کے باعث نہ صرف بازار میں آمدورفت متاثر ہو رہی ہے بلکہ کاروبار بھی مکمل طور پر ٹھپ ہو کر رہ گیا ہے۔

شہریوں کا کہنا ہے کہ عیدالفطر کے دوران بھی بیوٹیفکیشن کا کام جاری رہا اور اب عیدالاضحیٰ قریب آنے کے باوجود صورتحال جوں کی توں ہے، جس سے تاجروں کو شدید مالی نقصان کا سامنا کرنا پڑ رہا ہے۔

متاثرہ تاجروں اور شہریوں نے سوال اٹھایا کہ اگر تعمیراتی کام درست منصوبہ بندی کے تحت کیا جائے تو بار بار بنیڑوں کو توڑنے اور دوبارہ بنانے کی ضرورت کیوں پیش آ رہی ہے۔

عوامی اور تاجر حلقوں نے اعلیٰ حکام سے فوری نوٹس لینے، کام کے معیار کا جائزہ لینے اور بازار میں جاری تعمیراتی سرگرمیوں کو منظم انداز میں مکمل کروانے کا مطالبہ کیا ہے تاکہ شہریوں اور تاجروں کو ریلیف مل سکے۔