دینہ میں دعوتِ اسلامی کا عظیم الشان سنتوں بھرا اجتماع

42

دینہ میں دعوتِ اسلامی کے زیرِ اہتمام ایک عظیم الشان اور روح پرور سنتوں بھرا اجتماع منعقد ہوا، جس میں تحصیل دینہ سمیت گردونواح کے مختلف علاقوں سے ہزاروں عاشقانِ رسول ﷺ نے شرکت کی۔ اجتماع کا ماحول ایمان افروز، روحانی اور عقیدت و محبت سے بھرپور رہا، جہاں شرکاء نے بھرپور انداز میں سنتوں پر عمل کا جذبہ ظاہر کیا۔

اجتماع کے مہمانِ خصوصی ترجمان دعوتِ اسلامی اور رکنِ شورٰی حاجی عبدالحبیب طاری تھے۔ اپنے پُراثر اور ایمان افروز خطاب میں انہوں نے کہا کہ ہم سب کا اس اجتماع میں جمع ہونا اللہ پاک اپنی بارگاہ میں قبول فرمائے۔ انہوں نے درود و سلام کی فضیلت بیان کرتے ہوئے کہا کہ درودِ پاک پڑھنے کے بے شمار فوائد ہیں۔ ہمارے آقا حضرت محمد ﷺ کا فرمان ہے کہ جب تک مسلمان مجھ پر درود پڑھتا رہتا ہے، فرشتے اس پر رحمتیں بھیجتے رہتے ہیں۔ اب یہ بندے کی مرضی ہے کہ وہ کب اور کتنا درودِ پاک پڑھتا ہے۔

حاجی عبدالحبیب طاری نے مزید فرمایا کہ جو شخص جمعہ کے دن دو سو مرتبہ درودِ پاک پڑھتا ہے، اس کے دو سو برس کے گناہ معاف کر دیے جاتے ہیں۔ انہوں نے حاضرین کو نصیحت کرتے ہوئے کہا کہ بندے کو اپنی زندگی اس انداز میں گزارنی چاہیے کہ ہر وقت یہ فکر رہے کہ کب نبی کریم ﷺ کا دیدار نصیب ہو اور کب اللہ پاک سے ملاقات ہو۔ انہوں نے افسوس کا اظہار کرتے ہوئے کہا کہ ہم دنیا سے اس قدر محبت کرنے لگے ہیں کہ اللہ پاک کو بھول بیٹھے ہیں، حالانکہ موت مومن کے لیے تحفہ ہے۔

انہوں نے توبہ کی اہمیت پر روشنی ڈالتے ہوئے کہا کہ گناہ سے سچی توبہ کرنے والا ایسا ہے گویا اس نے گناہ کیا ہی نہیں، اور اللہ پاک کو وہی بندہ پسند ہے جو سچے دل سے توبہ کرتا ہے۔ خطاب کے دوران انہوں نے باجماعت نماز کی اہمیت بیان کرتے ہوئے کہا کہ ایک باجماعت نماز پڑھنے سے ستائیس گنا زیادہ ثواب ملتا ہے۔ مثال دیتے ہوئے انہوں نے کہا کہ اگر کسی کو معلوم ہو کہ اس کی چیز دوسرے محلے میں جا کر ستائیس گنا مہنگی فروخت ہوگی تو کون ہے جو وہاں نہ جائے؟ اسی طرح باجماعت نماز کا اجر بھی کئی گنا زیادہ ہے۔

حاجی عبدالحبیب طاری نے کہا کہ جو بندہ اللہ پاک سے سچے دل سے دعا کرتا ہے، اللہ پاک اسے کبھی خالی ہاتھ واپس نہیں لوٹاتا۔ خطاب کے اختتام پر انہوں نے رقت آمیز دعا کرواتے ہوئے رو رو کر اللہ تعالیٰ سے عالمِ اسلام کی بقا، امتِ مسلمہ کی سلامتی اور ملک و قوم کی خیر و برکت کے لیے خصوصی دعائیں کیں۔

اجتماع کے اختتام پر کامیاب اور شاندار انعقاد پر دعوتِ اسلامی دینہ تحصیل کے نگران حاجی طارق جاوید طاری، ڈسٹرکٹ جہلم کے نگران سجاد حسین طاری اور ایف جی آر ایف کے ذمہ دار شیخ ناہید کو مبارکباد پیش کی گئی۔ سنتوں بھرے اس اجتماع میں تحصیل دینہ کے علاوہ دیگر علاقوں سے بھی ہزاروں عقیدت مندوں نے شرکت کی، جبکہ شرکاء نے ایسے اجتماعات کو ایمان کی تازگی اور اصلاحِ اعمال کا بہترین ذریعہ قرار دیا۔