جہلم میں ناقص و مضر صحت فاسٹ فوڈ کی فروخت جاری، شہری بیماریوں کا شکار
جہلم شہر اور گرد و نواح میں ناقص اور مضر صحت فاسٹ فوڈ کی فروخت کا سلسلہ رک نہ سکا، غیر معیاری اشیاء بیچنے والے دکاندار شہریوں میں بیماریاں بانٹنے لگے۔
شہر کے مختلف علاقوں میں غیر معیاری شوارمہ، برگر، نان شامی، کباب، تکہ اور دیگر فاسٹ فوڈ کھلے عام فروخت کیے جا رہے ہیں۔ شہر کے چوک، بازار اور سڑکوں کے کنارے لگے اسٹالز اور بعض ہوٹلوں میں ناقص مصالحہ جات سے تیار شدہ کھانے عوام کو مہنگے داموں فروخت کیے جا رہے ہیں، جو شہریوں کی صحت پر منفی اثر ڈال رہے ہیں۔
متاثرہ شہریوں کا کہنا ہے کہ غیر معیاری اور غیر محفوظ کھانوں کی وجہ سے متعدد لوگ معدے، جگر اور دیگر بیماریوں کا شکار ہو رہے ہیں۔
شہریوں نے ڈی جی پنجاب فوڈ اتھارٹی سے مطالبہ کیا ہے کہ وہ حفظان صحت کے اصولوں کے برخلاف فاسٹ فوڈ فروخت کرنے والے دکانداروں کے خلاف سخت قانونی کارروائی عمل میں لائیں تاکہ عوام کو محفوظ اور معیاری خوراک میسر آ سکے۔
ہمیں فالو کریں
