جہلم کے بازاروں اور سڑکوں پر قبضہ مافیا کے خلاف کارروائی، عوامی سہولت کی راہ ہموار
جہلم: ڈپٹی کمشنر سید محمد میثم عباس کی فعال قیادت میں ضلعی انتظامیہ نے جہلم شہر کو تجاوزات سے پاک اور شہریوں کے لیے سہولتوں سے آراستہ بنانے کے لیے ایک جامع اور نتیجہ خیز مہم کا آغاز کر رکھا ہے۔
یہ مہم وزیراعلیٰ پنجاب مریم نواز شریف کے ویژن "تجاوزات سے پاک پنجاب” کی عملی تعبیر ہے، جو شہری زندگی کو سہل، صاف ستھرا اور باوقار بنانے کی سمت ایک اہم قدم ہے۔
ضلعی انتظامیہ کی جانب سے گزشتہ 72 گھنٹوں کے دوران شہر کے مختلف اہم مقامات پر بڑے پیمانے پر کارروائیاں کی گئیں، جن میں عارضی تجاوزات کا مکمل خاتمہ کیا گیا۔ سڑکوں، چوراہوں اور بازاروں میں قائم غیرقانونی ریڑھیاں اور رکاوٹیں ہٹا کر انتظامیہ نے یہ پیغام دیا کہ قانون شکنی پر کسی قسم کی رعایت نہیں برتی جائے گی۔
ان آپریشنز کے دوران میونسپل کمیٹی کے شعبہ انسداد تجاوزات نے شہر کے مصروف ترین علاقوں بشمول مین بازار، شاندار چوک، ریلوے روڈ، تحصیل روڈ اور سول لائن روڈ پر بھرپور کارروائی کرتے ہوئے غیرقانونی تجاوزات کو ہٹایا۔ ان اقدامات کا مقصد نہ صرف شہر کے حسن کو بحال کرنا ہے بلکہ پیدل چلنے والوں، دکانداروں اور ٹریفک کی روانی کو بہتر بنانا بھی ہے۔
ڈپٹی کمشنر سید محمد میثم عباس کا کہنا ہے کہ "ہم شہریوں کے تعاون سے جہلم کو ایک مثالی شہر بنانا چاہتے ہیں جہاں عوامی مقامات پر کسی قسم کی رکاوٹ نہ ہو، اور ہر فرد کو بنیادی شہری سہولیات میسر ہوں۔”
شہری حلقوں نے ضلعی انتظامیہ کی اس مہم کو سراہتے ہوئے اسے ایک خوش آئند اور دیرپا بہتری کی طرف قدم قرار دیا ہے۔ عوام کا کہنا ہے کہ ان کارروائیوں سے نہ صرف بازاروں میں رش کم ہوا ہے بلکہ خرید و فروخت میں بھی آسانی پیدا ہوئی ہے۔
انتظامیہ کی جانب سے یہ بھی واضح کیا گیا ہے کہ یہ مہم وقتی نہیں بلکہ مسلسل جاری رہے گی، اور مستقبل میں بھی تجاوزات کرنے والوں کے خلاف بلاامتیاز کارروائی عمل میں لائی جائے گی تاکہ قانون کی بالادستی کو یقینی بنایا جا سکے۔
