نور ویلفیئر سوسائٹی کا صنعت زار کی طالبات کے لیے خصوصی تحفہ، ہنر مند خواتین کو خود کفیل بنانے کے عزم کا اعادہ
جہلم: نور ویلفیئر سوسائٹی کی جانب سے صنعت زار میں زیرِ تربیت طالبات کی حوصلہ افزائی اور فلاح و بہبود کے لیے خصوصی تقریب کا انعقاد کیا گیا، جس میں تربیت حاصل کرنے والی بچیوں کو لنچ باکسز کا تحفہ پیش کیا گیا۔
تقریب میں صنعت زار کی زیرِ تربیت طالبات، محکمہ سوشل ویلفیئر کے افسران اور نور ویلفیئر سوسائٹی کے نمائندگان نے شرکت کی۔ اس موقع پر طالبات کی حوصلہ افزائی اور ان کی فنی صلاحیتوں کو سراہتے ہوئے انہیں مستقبل میں خود کفیل بنانے کے عزم کا اظہار کیا گیا۔
تقریب سے خطاب کرتے ہوئے نور ویلفیئر سوسائٹی کے جنرل سیکرٹری فرحت کمال ضیاء نے کہا کہ خواتین کو بااختیار بنانا اور انہیں معاشی طور پر خود مختار بنانا سوسائٹی کے بنیادی مقاصد میں شامل ہے۔ انہوں نے کہا کہ فنی تربیت حاصل کرنے والی بچیاں مستقبل میں نہ صرف اپنا روزگار کما سکتی ہیں بلکہ اپنے خاندانوں کی معاشی ترقی میں بھی اہم کردار ادا کر سکتی ہیں۔
انہوں نے اس موقع پر تربیت مکمل کرنے والی طالبات کو ان کی مہارت اور ضرورت کے مطابق سلائی مشینیں، سلائی کٹس اور بیوٹیشن کٹس فراہم کرنے کی یقین دہانی بھی کروائی تاکہ وہ اپنے ہنر کو عملی میدان میں بروئے کار لاتے ہوئے باعزت روزگار حاصل کر سکیں۔
ڈپٹی ڈائریکٹر سوشل ویلفیئر خضر حیات خان نے نور ویلفیئر سوسائٹی کی فلاحی خدمات کو سراہتے ہوئے کہا کہ خواتین کی فنی تربیت، ہنر مندی اور معاشی استحکام کے لیے نجی فلاحی اداروں کا تعاون نہایت اہم اور قابلِ تحسین ہے۔
انہوں نے کہا کہ سرکاری اداروں اور سماجی تنظیموں کے باہمی اشتراک سے خواتین کو خود کفیل بنانے، ان کے لیے روزگار کے مواقع پیدا کرنے اور انہیں معاشرے کا فعال اور باوقار رکن بنانے کے اہداف کے حصول میں نمایاں مدد ملتی ہے۔
مقررین نے اس عزم کا اظہار کیا کہ خواتین کی فلاح و بہبود، ہنر مندی کے فروغ اور معاشی خودمختاری کے لیے ایسی سرگرمیوں کا سلسلہ مستقبل میں بھی جاری رکھا جائے گا تاکہ زیادہ سے زیادہ خواتین اپنے پاؤں پر کھڑی ہو سکیں اور ملکی ترقی میں بھرپور کردار ادا کر سکیں۔
تقریب کے اختتام پر طالبات میں تحائف تقسیم کیے گئے جبکہ شرکاء نے نور ویلفیئر سوسائٹی کی جانب سے خواتین کی فلاح و بہبود اور ہنر مندی کے فروغ کے لیے کی جانے والی کاوشوں کو سراہتے ہوئے نیک تمناؤں کا اظہار کیا۔
