فلسطینی عوام پر ظلم و ستم کے پہاڑ توڑے جا رہے ہیں، ڈاکٹر قاسم محمود چوہدری
دینہ: ڈاکٹر قاسم محمود چوہدری نے کہا کہ فلسطین کے حق میں ریلیوں سے فلسطین کی عوام کے حوصلے بلند ہوتے ہیں، ایک سال بیس دن ہو گئے فلسطین کے اوپر ظلم کے پہاڑ توڑے جا رہے ہیں۔ افسوس مسلمان ممالک کے سربراہ اپنی اقتدار کی جنگ لڑ رہے ہیں، اپنی کرسی کو مظبوط کرنے کے لیے فیصلے کر رہے ہیں۔
جماعت اسلامی کے زیر اہتمام فلسطین کے حق میں نکالی گئی ریلی سے دینہ مین چوک پر جماعت اسلامی ضلع جہلم کے امیر ڈاکٹر قاسم محمود چوہدری نے خطاب کرتے ہوئے کہا کہ یہ بات یاد ررکھیں اگر ہم فلسطینیوں کے لیے نہیں نکلیں گے اور اپنی دوکانوں میں بیٹھے رہیں گے، ایک دن اسرائیلی ڈرون طیارے آئیں گے اور آپ کی دوکانوں کو تباہ کر کے چلے جائیں گے۔ اسرائیل کے جو بم ہیں وہ دینہ کے چوکوں میں برسیں گے، ہمارے وزیر دفاع کہتے ہیں کہ اسرائیل پاکستان پر حملہ نہیں کر سکتا انہیں پوچھیں کہ اگر اسرائیل نے حملہ کیا تو کیا آپ سے پوچھ کر کرے گا۔
انہوں نے کہا کہ آج فلسطین کے حق میں جماعت اسلامی پاکستان کے امیر حافظ نعیم کی کال پر پورے پاکستا ن میں ریلیاں نکالی جا رہی ہیں۔ پورا غزہ کھنڈر بن چکا ہے، رہائشی مکان ، ہسپتال ، ادارے ، مساجد ، مدرسے اور گلیاں بازار بارود کا ڈھیر نظر آتے ہیں۔ مسجد کے اندر بمباری کی گئی ، نمازیوں کے پرخچے اڑا دیے گئے ، ان کے جسموں کے ٹکڑے ہو گئے لیکن ہمارے مسلمان خاموش تماشائی کا کردار ادا کر رہے ہیں۔
ڈاکٹر قاسم محمود چوہدری نے کہا کہ اسرائیل کے عزائم بہت خطرناک ہیں اس نے پورا نقشہ بنایا ہوا ہے۔ عراق ، ایران ، شام ، لبنان ، مکہ ،مدینہ اور پاکستا ن بھی اس کے عزائم پر ہے، وہ پوری دنیا پر قبضہ کرنا چاہتا ہے ہم مسلمان ہیں مگر آپس میں بٹے ہوئے ہیں مگر پورا یورپ اسرائیل کی حمایت کر رہا ہے مگر ہمارے حکمران ڈرتے ہیں کہ امریکہ بابا ناراض نہ ہو جائے ، اقتدار چھین لیا جا ئے گا جو لوگ ان کے حمایتی ہیں ان کو بھی حساب دینا ہو گا جنہوں نے ووٹیں دے کر ان کو بٹھایا ہوا ہے۔ میری دوکاندار بھائیوں سے اپیل ہے کہ یہودی مصنوعات کا بائیکاٹ کریں۔
ریلی سے مظاہر الاسلام امیر جماعت اسلامی دینہ ، مولانا عبدالمجید ، امیر زون جہلم ، سید خرم شاہ سیکرٹری اطالاعات جماعت اسلامی دینہ نے بھی خطاب کیا۔
تازہ ترین خبروں کیلئے ہمیں گوگل نیوز پر فالو کریں
