سوہاوہ کے مشہور قتل کیس کا فیصلہ؛ جرم ثابت ہونے پر مجرم کو 2 مرتبہ سزائے موت اور جرمانے کی سزا
سوہاوہ کے مشہور قتل کیس کا فیصلہ؛ جرم ثابت ہونے پر مجرم کو 2 مرتبہ سزائے موت اور بھاری جرمانے کی سزا سنا دی گئی۔
تفصیلات کے مطابق عدالت نے تھانہ سوہاوہ میں درج قتل کے مقدمہ نمبر 203/23 بجرم 302/324/337F(iii) / 337L(i) کا فیصلہ سناتے ہوئے مجرم حسن علی کو سخت سزائیں سنائیں۔ مجرم نے سال 2023 میں ایک شخص کو قتل کرنے کا سنگین جرم کیا تھا۔
عدالتی فیصلے کے مطابق مجرم حسن علی کو دفعہ 302 میں دو مرتبہ سزائے موت اور 5 لاکھ روپے جرمانہ، دفعہ 324 میں 10 سال قید بامشقت اور 20 ہزار روپے جرمانہ، دفعہ 337F(iii) میں 3 سال قید بامشقت اور 50 ہزار روپے جرمانہ، جبکہ دفعہ 337L(i) میں 7 سال قید بامشقت اور 80 ہزار روپے جرمانے کی سزا سنائی گئی۔
ڈی پی او جہلم کے مطابق جہلم پولیس نے مقدمہ کو ٹریس کرتے ہوئے مجرم کو گرفتار کیا، ٹھوس شواہد اکٹھے کیے اور مقدمے کا چالان عدالت میں پیش کیا، جس پر عدالت نے مجرم کو قرار واقعی سزا سنائی۔
ڈی پی او جہلم نے کہا کہ سنگین نوعیت کے مقدمات میں زیرو ٹالرنس پالیسی پر عمل کیا جا رہا ہے۔ انہوں نے مقدمے میں شاندار کارکردگی دکھانے پر انوسٹیگیشن اور لیگل ٹیموں کو شاباش دیتے ہوئے تعریفی سرٹیفکیٹ اور نقد انعام دینے کا اعلان کیا۔
