پنڈدادنخان کے سینئر وکیل چوہدری اشرف آرائیں ٹریفک حادثے میں جاں بحق، بیٹا زخمی، مقدمہ درج

پنڈدادنخان بار ایسوسی ایشن کے سینئر قانون دان، ایڈووکیٹ چوہدری اشرف آرائیں ایک افسوسناک ٹریفک حادثے میں جاں بحق ہو گئے۔

یہ افسوسناک حادثہ للِہ روڈ پر پیش آیا، جب چوہدری اشرف آرائیں ایڈووکیٹ اپنے بیٹے کے ہمراہ موٹر سائیکل پر سوار تھے اور للِہ شریف سے پنڈدادنخان واپس آ رہے تھے۔ اسی دوران پیچھے سے آنے والی ایک تیز رفتار نامعلوم کار نے موٹر سائیکل کو زور دار ٹکر ماری۔

حادثے کے نتیجے میں ایڈووکیٹ چوہدری اشرف آرائیں موقع پر ہی جاں بحق ہو گئے جبکہ ان کا بیٹا زخمی ہوا۔ حادثے کے بعد کار ڈرائیور کار سمیت موقع سے فرار ہو گیا۔

پولیس نے نامعلوم کار سوار کے خلاف تھانہ پنڈدادنخان میں مقدمہ درج کر کے ملزمان کی تلاش شروع کر دی ہے۔ پولیس کا کہنا ہے کہ فرار ہونے والے ملزمان کو جلد گرفتار کر کے قانون کے مطابق کارروائی عمل میں لائی جائے گی۔