وقت کی پابندی، سکول اساتذہ کا 8 بجکر 45 منٹ پر گروپ فوٹو لازمی قرار
جہلم سمیت پنجاب بھر کے سرکاری اسکولوں میں حاضری، وقت کی پابندی اور مؤثر مانیٹرنگ کو یقینی بنانے کے لیے ڈسٹرکٹ ایجوکیشن اتھارٹی پنجاب کی جانب سے نئے حکم نامے جاری کر دیے گئے ہیں۔
جاری کردہ احکامات کے مطابق تمام سرکاری اسکولوں میں روزانہ صبح 8 بج کر 45 منٹ پر تدریسی اور نان ٹیچنگ اسٹاف کی گروپ تصویر لینا لازمی قرار دیا گیا ہے۔
حکم نامے میں واضح کیا گیا ہے کہ اساتذہ اور نان ٹیچنگ اسٹاف کی روزانہ کی بنیاد پر مانیٹرنگ کی جائے گی۔ اتھارٹی کی جانب سے ہدایت دی گئی ہے کہ حاضری رجسٹر کے ساتھ کنوا (Canva) کیمرہ ایپ کے ذریعے گروپ تصویر لی جائے، جس سے وقت اور موجودگی کی بروقت تصدیق ممکن ہو سکے گی۔
مزید ہدایات کے مطابق تمام اسکولوں کی تصاویر کو ایک پی ڈی ایف فائل کی شکل میں مرتب کر کے صبح 9 بج کر 30 منٹ تک واٹس ایپ کے ذریعے متعلقہ حکام کو ارسال کرنا ہوگا۔ اس سلسلے میں ہیڈ ٹیچرز کو پابند کیا گیا ہے کہ وہ اساتذہ اور نان ٹیچنگ اسٹاف کی روزانہ رپورٹ بروقت اعلیٰ حکام تک پہنچائیں۔
حکم نامے میں یہ بھی واضح کیا گیا ہے کہ جاری کردہ احکامات پر عملدرآمد نہ کرنے والے اسکول سربراہان کے خلاف سخت تادیبی کارروائیاں عمل میں لائی جائیں گی۔ حکام کے مطابق اس اقدام کا مقصد سرکاری اسکولوں میں نظم و ضبط کو بہتر بنانا، حاضری کو یقینی بنانا اور تعلیمی نظام کی کارکردگی کو مزید مؤثر بنانا ہے۔
