بجلی اور گیس کے بلوں سے اضافی ٹیکس ختم کیے جائیں، عوام کو حقیقی ریلیف دیا جائے۔ حاجی حبیب الرحمٰن چوہدری
جہلم: انجمن آرائیاں ضلع جہلم کے صدر حاجی حبیب الرحمٰن چوہدری نے حکومت سے مطالبہ کیا ہے کہ بجلی اور گیس کے بلوں میں شامل اضافی ٹیکسوں، سرچارجز اور دیگر مالی بوجھ کو ختم کر کے عوام کو حقیقی ریلیف فراہم کیا جائے۔
اپنے ایک بیان میں انہوں نے کہا کہ مہنگائی کے موجودہ دور میں بجلی اور گیس کے بھاری بھرکم بلوں نے غریب اور متوسط طبقے کی کمر توڑ کر رکھ دی ہے، جبکہ عام شہری کے لیے روزمرہ گھریلو اخراجات پورے کرنا بھی انتہائی مشکل ہوتا جا رہا ہے۔
حاجی حبیب الرحمٰن چوہدری کا کہنا تھا کہ عوام پہلے ہی مہنگائی، بے روزگاری اور بڑھتے ہوئے معاشی مسائل کے باعث شدید مشکلات کا شکار ہیں۔ ایسے حالات میں یوٹیلٹی بلوں پر عائد اضافی ٹیکس اور سرچارجز عوامی پریشانیوں میں مزید اضافہ کر رہے ہیں، جس کے باعث شہریوں کی قوتِ خرید متاثر ہو رہی ہے۔
انہوں نے حکومت پر زور دیا کہ عوامی مسائل کو ترجیحی بنیادوں پر حل کیا جائے اور بجلی و گیس کے نرخوں میں کمی کے ساتھ ساتھ غیر ضروری ٹیکسوں کا خاتمہ بھی یقینی بنایا جائے تاکہ شہریوں کو حقیقی معنوں میں ریلیف مل سکے۔
انجمن آرائیاں ضلع جہلم کے صدر نے کہا کہ ان کی تنظیم ہمیشہ عوامی مسائل کو اجاگر کرنے اور ان کے حل کے لیے آواز بلند کرتی رہی ہے۔ عوام کو درپیش بنیادی مشکلات اور معاشی مسائل کو متعلقہ حکام تک پہنچانا اور شہریوں کے لیے سہولتوں کے حصول کی کوشش کرنا انجمن کی اولین ترجیحات میں شامل ہے۔
انہوں نے امید ظاہر کی کہ حکومت عوامی مشکلات کا احساس کرتے ہوئے فوری اور مؤثر اقدامات کرے گی تاکہ مہنگائی کے بوجھ تلے دبے ہوئے شہریوں کو ریلیف مل سکے اور ان کے معاشی مسائل میں کمی واقع ہو۔
