دینہ میں ڈاکوؤں نے پولیو ٹیم کے ایریا انچارج کو گن پوائنٹ پر لوٹ لیا

دینہ میں مسلح ڈاکوؤں نے پولیو ٹیم کے ایریا انچارج کو اسلحہ کی نوک پر یرغمال بنا کر پولیو ٹیبلٹ، ذاتی ٹیبلٹ، موبائل فون، اے ٹی ایم کارڈ اور نقدی چھین کر فرار ہو گئے، پولیس نے رپورٹ درج کر کے ڈاکوؤں کی تلاش شروع کر دی۔

تفصیلات کے مطابق جہلم کی تحصیل دینہ میں پولیو ٹیم بنیادی مرکز صحت سناٹھہ اپنا پولیو مہم ورک مکمل کر کے رورل ہیلتھ سنٹر دینہ آ رہے تھے کہ الطاف بائی پاس کے مقام پر 3مسلح ڈاکوؤں نے گھیر لیا۔

ڈاکوؤں نے سینٹری انسپکٹر انچارج پولیو ٹیم یو سی لدھڑ فتح محمد کو گن پوائنٹ پر قابو کر لیا اور جان سے مار دینے کی دھمکی دیتے ہوئے ان سے سرکاری پولیو ٹیبلٹ، ذاتی ٹیبلٹ، موبائل فون ، اے ٹی ایم کارڈ اور نقدی چھین کر فرار ہونے میں کامیاب ہو گئے۔

وقوعہ کی اطلاع ملتے ہی ڈپٹی ہیلتھ آفیسر دینہ ڈاکٹر ارشاد تونیو اور پولیس تھانہ دینہ کی بھاری نفری موقع پر پہنچ گئی اور رپورٹ درج کر کے ڈاکوؤں کی تلاش شروع کر دی ۔