ڈسٹرکٹ ہیڈکوارٹر ہسپتال جہلم میں طبی سہولیات کی فراہمی کی مسلسل نگرانی جاری ہے، ڈپٹی کمشنر میثم عباس

جہلم: ڈسٹرکٹ ہیڈکوارٹر (ڈی ایچ کیو) ہسپتال جہلم میں شہریوں کو معیاری طبی سہولیات فراہم کرنے کے لیے مسلسل نگرانی جاری ہے۔

اس حوالے سے ڈپٹی کمشنر جہلم میثم عباس نے ڈی ایچ کیو ہسپتال کا دورہ کیا اور مریضوں کو فراہم کی جانے والی سہولیات کا تفصیلی جائزہ لیا۔ ڈپٹی کمشنر نے مختلف وارڈز کا دورہ کرتے ہوئے زیر علاج مریضوں سے ملاقات کی اور ان سے ہسپتال عملے کے رویے، ادویات کی دستیابی اور دیگر طبی سہولیات کے بارے میں معلومات حاصل کیں۔

انہوں نے اس موقع پر مریضوں کے مسائل بھی سنے اور ہسپتال انتظامیہ کو فوری طور پر ضروری اقدامات کرنے کی ہدایت کی۔

دورے کے دوران ایم ایس سول ہسپتال ڈاکٹر شکیل نے ڈپٹی کمشنر کو ہسپتال کے مختلف شعبوں کا دورہ کروایا اور ہسپتال میں جاری طبی سرگرمیوں سے آگاہ کیا۔ انہوں نے ہسپتال میں درپیش چیلنجز اور دستیاب سہولیات کے حوالے سے بھی تفصیلات فراہم کیں۔

ڈپٹی کمشنر میثم عباس نے ہسپتال عملے کو ہدایت کی کہ دستیاب وسائل کے اندر رہتے ہوئے مریضوں کو زیادہ سے زیادہ سہولیات فراہم کی جائیں اور اس بات کو یقینی بنایا جائے کہ ہر شہری کو یکساں اور معیاری علاج میسر ہو۔ انہوں نے مزید کہا کہ عوام کو بہتر طبی سہولیات فراہم کرنا ضلعی انتظامیہ کی اولین ترجیح ہے اور اس حوالے سے کسی قسم کی کوتاہی برداشت نہیں کی جائے گی۔

ہسپتال میں طبی سہولیات کو مزید بہتر بنانے کے لیے ڈپٹی کمشنر نے متعلقہ محکموں کو بھی ضروری اقدامات اٹھانے کی ہدایت کی اور مریضوں کے لیے ہر ممکن سہولت فراہم کرنے کا عزم دہرایا۔