میونسپل کمیٹی جہلم کو سینٹری ورکرز کے تحفظ کیلئے 6 ملین روپے مالیت کے حفاظتی آلات کی فراہمی
جہلم: ڈپٹی کمشنر میثم عباس نے کہا کہ سینٹری ورکرز کی قیمتی جانوں کے تحفظ اور شہریوں کو بہتر بلدیاتی سہولیات کی فراہمی کے لیے جدید مشینری اور حفاظتی سامان فراہم کیا جا رہا ہے۔ اس سامان میں خصوصی حفاظتی لباس، آکسیجن سلنڈر، وینٹلیشن سسٹم اور سیفٹی ہیلمٹس شامل ہیں۔ یہ سامان جرمن ترقیاتی ادارے کی مالی معاونت سے قریب ساٹھ لاکھ روپے کی مالیت کا ہے اور جلد سینٹری ورکرز کے استعمال کے لیے میسر ہوگا۔
ڈپٹی کمشنر جہلم سید محمد میثم عباس نے ان حفاظتی آلات کے استعمال پر منعقد کی گئی ٹریننگ ورکشاپ کے شرکاء سے خطاب کرتے ہوئے کہا کہ ان جدید حفاظتی آلات کے استعمال سے نہ صرف سینٹری ورکرز کی جانوں کا تحفظ ہوگا بلکہ وہ مختلف خطرناک جراثیم اور بیماریوں سے بھی بچ سکیں گے۔ اس کے علاوہ ان کی کارکردگی میں بھی خاطر خواہ اضافہ ہوگا۔
محمود مسعود تمنا جنرل منیجر آئی ڈی پی ایم ڈی ایف سی نے شرکاء سے خطاب کرتے ہوئے کہا کہ اس ایونٹ کا انعقاد پنجاب میونسپل ڈویلپمنٹ فنڈ کمپنی اور جرمن ترقیاتی ادارے کی معاونت سے کیا گیا ہے، جو کہ جہلم کے علاوہ شیخوپورہ، ٹوبہ ٹیک سنگھ اور لاہور میں بھی جاری ہے۔
اس ٹریننگ ورکشاپ میں پچاس سے زائد مرد و خواتین سینٹری ورکرز کو سالڈ اور لیکوئڈ ویسٹ کے حوالے سے پیشہ ورانہ تحفظ اور صحت کے بارے میں آگاہی دی گئی۔ ماہر ٹرینر ظہیر احمد نے شرکاء کو ایک خصوصی کتابچہ بھی فراہم کیا جس میں اس حوالے سے تمام تفصیلات موجود ہیں تاکہ سینٹری ورکرز اور سپر وائزر ان رہنما اصولوں پر عمل کرتے ہوئے اپنی پیشہ ورانہ ذمہ داریاں محفوظ اور بہتر انداز میں ادا کر سکیں۔
ظفر اقبال نے ٹریننگ ورکشاپ میں شرکا کو مختلف آلہ جات کے استعمال کے حوالے سے عملی تربیت بھی دی۔ شرکاء کا کہنا تھا کہ اس ٹریننگ سے انہیں بہت فائدہ ہوا ہے اور اب وہ سیوریج میں موجود مضر صحت گیسوں اور خطرناک ویسٹ سے بچتے ہوئے اپنے فرائض منصبی کو مزید محفوظ اور بہتر طریقے سے انجام دے سکیں گے۔
تقریب میں ایڈمنسٹریٹر میونسپل کمیٹی جہلم صباء سحر، پنجاب میونسپل ڈویلپمنٹ فنڈ کمپنی کے وہاب خالد، گلزار حسین، محمد قاسم، پروگرام آفیسرز صہیب رفیق، ڈپٹی منیجر مبشر احمد اور میونسپل کمیٹی جہلم کے دیگر افسران نے بھی شرکت کی۔
تقریب کے اختتام پر شرکاء کو سرٹیفکیٹس بھی دیئے گئے۔
