جہلم میں کشمیر کی خصوصی حیثیت ختم کرنے اور بھارتی غاصبانہ قبضے کے خلاف احتجاجی ریلی نکالی گئی

جہلم: کشمیر کی خصوصی حیثیت ختم کرنے اور بھارتی غاصبانہ قبضے کے خلاف احتجاجی ریلی نکالی گئی، ڈپٹی کمشنر جہلم سیدہ رملہ علی نے ریلی کی قیادت کی۔

تفصیلات کے مطابق ڈپٹی کمشنر جہلم سیدہ رملہ علی کی قیادت میں ضلعی انتظامیہ کی جانب سے مقبوضہ کشمیر کی خصوصی حیثیت ختم کرنے کے 5 اگست 2019 کے اقدامات کے خلاف ایک ریلی کا انعقاد ڈی سی دفتر جہلم سے پریس کلب تک کیا گیا جس میں تمام ضلعی محکموں کے افسران ملازمین اور سماجی شخصیات کی بڑی تعداد نے شرکت کی۔

اس موقع پر میڈیا سے گفتگو کرتے ہوئے ڈپٹی کمشنر سیدہ رملہ علی نے کہا کہ 5 اگست 2019 کو بھارت نے مقبوضہ کشمیر کی خصوصی حیثیت ختم کرکے کشمیری عوام کی حق تلفی اور ان کو اقلیت میں بدلنے کے مذموم مقاصد حاصل کرنے کی کوشش کی جس کے خلاف دنیا بھر میں احتجاج جاری ہے۔

انہوں نے کہا کہ ہماری آج کی ریلی کا مقصد یہ پیغام دینا ہے کہ پوری پاکستانی قوم بھارتی غاصبانہ قبضے کے خلاف ہم آواز ہے اور کوئی بھی پاکستانی کشمیریوں کے حق خود ارادیت کے خلاف اقدامات کو تسلیم نہیں کرے گا کشمیر کی آزادی تک ہم اپنے بھائیوں کی ہر قسم کی حمایت جاری رکھیں گے۔