تحصیل ہیڈ کوارٹر ہسپتال سوہاوہ میں پولیو مہم کے حوالے سے اہم میٹنگ، مشترکہ کاوشوں پر زور
سوہاوہ: تحصیل ہیڈ کوارٹر ہسپتال سوہاوہ میں پولیو کے تدارک کے حوالے سے ایک اہم میٹنگ کا انعقاد کیا گیا۔
یہ میٹنگ 3 فروری سے 7 فروری تک جاری رہنے والی پولیو مہم کی تیاریوں اور حکمت عملی کے جائزے کے لیے بلائی گئی تھی۔ میٹنگ میں مختلف محکموں اور شعبوں کے نمائندگان، سیاسی و سماجی شخصیات، مذہبی رہنما، اور میڈیا نمائندگان نے بھرپور شرکت کی۔
میٹنگ کا مقصد علاقے میں پولیو کے خاتمے کے لیے مؤثر حکمت عملی پر غور کرنا، عوامی شعور اجاگر کرنا، اور تمام متعلقہ اداروں کے درمیان باہمی تعاون کو مضبوط بنانا تھا۔ میٹنگ میں محکمہ صحت، محکمہ تعلیم، موٹروے پولیس، پنجاب پولیس، محکمہ مال، یونین کونسل سیکرٹریز، چیئرمین یونین کونسلز اور عالمی ادارہ صحت (WHO) کے نمائندے ڈاکٹر ممتاز نے شرکت کی۔
میٹنگ کے دوران انچارج پولیو مہم سید کاظم عباس نے پولیو کے قطرے پلانے کی اہمیت اور اس کے فوائد پر روشنی ڈالی۔ انہوں نے عزم کیا کہ علاقے میں پانچ سال سے کم عمر کسی بھی بچے کو پولیو کے قطروں سے محروم نہیں رہنے دیا جائے گا۔ انہوں نے کہا کہ والدین اور عوام کو پولیو کے خطرات سے آگاہ کرنا ضروری ہے تاکہ وہ اس مہم میں بھرپور تعاون کریں۔
موٹروے پولیس اور پنجاب پولیس کے نمائندگان نے پولیو ٹیموں کی حفاظت اور سکیورٹی یقینی بنانے کے لیے اپنے مکمل تعاون کا یقین دلایا۔ محکمہ تعلیم کے نمائندوں نے تعلیمی اداروں میں طلباء کو پولیو کے حوالے سے آگاہی فراہم کرنے اور والدین کو بچوں کو قطرے پلانے کی اہمیت سمجھانے کا عزم کیا۔
میٹنگ کے اختتام پر تمام شرکاء نے اس بات پر اتفاق کیا کہ پولیو جیسی موذی بیماری کے خاتمے کے لیے عوامی شعور بیدار کرنا اور تمام محکموں کا باہمی تعاون انتہائی ضروری ہے۔ تمام محکموں کے نمائندوں نے پولیو کے خلاف جاری مہم کو مزید مؤثر بنانے اور عوام کو اس خطرناک بیماری سے محفوظ رکھنے کے لیے ہر ممکن اقدامات کرنے کا عزم کیا۔
میٹنگ کے دوران WHO کے نمائندے ڈاکٹر ممتاز نے عالمی سطح پر پولیو کے تدارک کے لیے کی جانے والی کاوشوں پر روشنی ڈالی اور مقامی حکام کو اپنے مکمل تعاون کی یقین دہانی کرائی۔ شرکاء نے عوامی شعور اجاگر کرنے، والدین کو بچوں کو قطرے پلانے کی ترغیب دینے، اور تمام متعلقہ اداروں کے درمیان رابطے کو مزید مضبوط کرنے پر زور دیا۔
