بنگلہ دیشی ہائی کمشنر کا جہلم کا دورہ، ،تاجروں سے ملاقات، دو طرفہ تجارتی تعاون کو فروغ دینے پر اتفاق
جہلم: بنگلہ دیش کے ہائی کمشنر محمد اقبال حسین خان نے ایک اعلیٰ سطحی وفد کے ہمراہ جہلم کا دورہ کیا۔
اس دورے کا مقصد پاکستان اور بنگلہ دیش کے درمیان دو طرفہ تجارت، سرمایہ کاری اور صنعتی تعاون کو فروغ دینا تھا۔ جہلم چیمبر آف کامرس اینڈ انڈسٹری کے صدر زاہد حسین بٹ کی خصوصی دعوت پر ہائی کمشنر کا پرتپاک استقبال کیا گیا۔
بنگلہ دیشی وفد میں ڈپٹی ہائی کمشنر محمد امین الاسلام خان، کونسلر پریس محمد طیب، اور ایڈمنسٹریٹر آفس محمد محفوظ لحسن شامل تھے۔ وفد نے جہلم چیمبر آف کامرس کے ایگزیکٹو ممبران اور مقامی تاجروں سے ملاقات کی اور باہمی تجارتی مواقع پر تفصیلی تبادلہ خیال کیا۔
اس موقع پر ہائی کمشنر اقبال حسین نے دونوں ممالک کے درمیان تجارتی روابط کو مزید مضبوط کرنے کی ضرورت پر زور دیتے ہوئے کہا کہ تجارت، سرمایہ کاری اور صنعتی تعاون کے فروغ کے لیے مشترکہ اقدامات کیے جائیں گے۔
انہوں نے پاکستانی تاجروں کو بنگلہ دیش میں موجود سرمایہ کاری کے مواقع سے فائدہ اٹھانے کی دعوت بھی دی اور اعلان کیا کہ تاجروں کے لیے بنگلہ دیشی ویزہ میں خصوصی سہولت فراہم کی جائے گی۔
صدر چیمبر زاہد حسین بٹ نے مہمان وفد کا خیر مقدم کرتے ہوئے انہیں چیمبر کی جانب سے یادگاری شیلڈز پیش کیں۔ ملاقات خوشگوار ماحول میں اختتام پذیر ہوئی اور دونوں جانب سے مستقبل میں قریبی روابط کے عزم کا اعادہ کیا گیا۔
ہائی کمشنر محمد اقبال حسین خان نے جہلم کے تاریخی و ثقافتی ورثے میں گہری دلچسپی کا اظہار کرتے ہوئے قلعہ روہتاس، قلعہ نندنا، کھیوڑہ کی نمک کان، اور سکندر اعظم کے تاریخی مقامات کا دورہ کرنے کی خواہش ظاہر کی۔
میڈیا سے گفتگو میں بنگلہ دیشی ہائی کمشنر محمد اقبال حسین خان نے خطے کی موجودہ صورتحال پر تبصرہ کرتے ہوئے کہا کہ بنگلہ دیش نے پاک بھارت کشیدگی کے پیش نظر بھارتی طیاروں کو اپنی فضائی حدود استعمال کرنے کی اجازت نہیں دی۔ انہوں نے بتایا کہ حکومت بنگلہ دیش پاکستان کے ساتھ مل کر تجارتی منصوبوں کو عملی جامہ پہنانے کے لیے سنجیدہ اقدامات کر رہی ہے۔
دورے کے اختتام پر ہائی کمشنر نے جہلم چیمبر آف کامرس اینڈ انڈسٹری کے وفد کو بنگلہ دیش کے دورے کی باضابطہ دعوت دی تاکہ دونوں ملکوں کے درمیان تجارتی تعاون کو مزید وسعت دی جا سکے۔
