ڈپٹی کمشنر جہلم کا رمضان سہولت بازار کا دورہ، مہنگی اشیاء فروخت کرنے والوں کے خلاف کارروائی کا حکم
جہلم: ڈپٹی کمشنر جہلم سید محمد میثم عباس نے رمضان سہولت بازار کا دورہ کیا، جہاں انہوں نے مختلف اسٹالز پر جا کر اشیائے خوردونوش کی قیمتوں، معیار اور دستیابی کا تفصیلی جائزہ لیا۔
دورے کے دوران شہریوں نے شکایت کی کہ بعض دکاندار سرکاری نرخوں سے زائد قیمت پر سبزیاں فروخت کر رہے ہیں۔ اس پر ڈپٹی کمشنر نے مہنگے داموں سبزی فروخت کرنے والے دکاندار کے خلاف فوری طور پر ایف آئی آر درج کرنے کا حکم دیا جبکہ غیر معیاری اشیاء فروخت کرنے والے ایک اور دکاندار کو سخت وارننگ جاری کی۔
ڈپٹی کمشنر میثم عباس نے واضح کیا کہ رمضان سہولت بازار میں عوام کو ریلیف فراہم کرنے میں کوتاہی برتنے والے دکانداروں کے خلاف سخت قانونی کارروائی کی جائے گی۔
انہوں نے شہریوں کو ہدایت کی کہ خریداری کے دوران سرکاری نرخ نامے کے مطابق ادائیگی کریں اور زائد قیمت وصول کرنے والے دکانداروں کی فوری شکایت رمضان بازار میں تعینات سرکاری افسران سے کریں تاکہ ان کے خلاف فوری ایکشن لیا جا سکے۔
انہوں نے مزید کہا کہ ضلعی انتظامیہ شہریوں کو سہولت فراہم کرنے کے لیے رمضان بازاروں کی مسلسل مانیٹرنگ کر رہی ہے اور عوام کو اشیائے خورونوش مناسب قیمت پر فراہم کرنے کے لیے ہر ممکن اقدامات کیے جا رہے ہیں۔
