پنڈدادنخان میں موٹر سائیکل سلپ ہونے سے ایک نوجوان جاں بحق، 2 نوجوان شدید زخمی

پنڈدادنخان میں کھیوڑہ کے قریب موٹر سائیکل حادثے میں ایک نوجوان جاں بحق اور 2 نوجوان شدید زخمی ہو گئے۔

تفصیلات کے مطابق گزشتہ روز جہلم کی تحصیل پنڈدادنخان میں کھیوڑہ کے قریب ایک افسوسناک موٹر سائیکل حادثہ پیش آیا، جس میں تین نوجوان شدید زخمی ہو گئے۔ حادثے کی وجہ موٹر سائیکل کا سلپ ہو کر گرنا بتایا جا رہا ہے۔

حادثے کے فوری بعد مقامی افراد نے ریسکیو ٹیموں کو اطلاع دی، جنہوں نے تینوں زخمی نوجوانوں کو ابتدائی طبی امداد فراہم کرنے کے بعد تحصیل ہیڈ کوارٹر ہسپتال پنڈدادنخان منتقل کیا۔ تاہم زخمیوں کی حالت نازک ہونے کے باعث دو نوجوانوں کو راولپنڈی ہسپتال ریفر کر دیا گیا۔

دورانِ علاج ایک نوجوان عاقب عرف مانی جانبر نہ ہو سکا اور زخموں کی تاب نہ لاتے ہوئے دم توڑ گیا۔ جاں بحق ہونے والا نوجوان حال ہی میں بیرون ملک سے عید کی چھٹیاں منانے کے لیے اپنے گھر آیا تھا۔

حادثے کی خبر سنتے ہی علاقے میں سوگ کی فضا چھا گئی جبکہ سوشل میڈیا پر بھی نوجوان کی ناگہانی موت پر شدید غم و افسوس کا اظہار کیا جا رہا ہے۔