نوجوانوں کو دینی تعلیم و تربیت سے آراستہ کرنا وقت کی اہم ضرورت ہے، صاحبزادہ پیر ڈاکٹر ساجد الرحمٰن

بریڈفورڈ: المرکز اسلامی بریڈ فورڈ میں گریجویشن کی ایک پروقار تقریب کا انعقاد کیا گیا جس میں202طالبات اور 25طلباء کو گریجویشن مکمل کرنے پر اسناد دی گئیں۔

گریجویشن کی تقریب میں عالمی مبلغ اسلام صاحبزادہ پیر ڈاکٹر ساجد الرحمٰن سجادہ نشین آستانہ عالیہ بگھار شریف ،صاحبزادہ پیر سلطان نیاز الحسن جگر گوشہ سلطان بہو ٹرسٹ مہمان خصوصی تھے جبکہ شیخ عبدالحق بیولی ،علامہ مفتی انصر القادری ،علامہ قاری محمد عاصم ، علامہ مفتی فضل سبحانی قادری ، علامہ عمر حیات قادری ،پیر سید سلطان شاہ مشہدی ،ناز شاہ ایم پی ، معروف برطانوی جرنلسٹ ایوان رڈلے اور برطانیہ بھر سے علماء اور مذہبی اسکالرز نے خصوصی شرکت کی۔

اس موقع پر ڈاکٹر ساجد الرحمٰن نے خطاب کرتے ہوئے کہا کہ مفتی حسن رضا نے برطانیہ میں نوجوانوں کو علوم دینیہ کی تعلیم کے زیور سے آراستہ کر کے ایک انقلاب کی بنیاد رکھی ہے دور حاضر میں برطانیہ کے علماء اور دینی اداروں کو نوجوانوں کو دینی تعلیم دینا اور ان کی تربیت کا فریضہ سرانجام دینا وقت کی اہم ضرورت ہے وہ وقت دور نہیں جب یورپ کی سرزمین پر یہ نوجوان اللہ کی رضا کو پیش نظر رکھتے ہوئے دین حق کا عَلم بلند کریں گے اور دنیا بھر میں مسلمان ایک بار پھر اپنی علمی جلالت کا جھنڈا لہرائیں گے۔

معروف برطانوی جرنلسٹ ایوان رڈلے نے کہا کہ آج بریڈفورڈ کی سرزمین پر سینکڑوں بچیوں نے دینی تعلیم میں گریجویشن حاصل کر کے پوری دنیا سمیت افغانستان کے مسلمانوں کو مثبت پیغام دیاہے کہ کہ ایک عورت کی تعلیم پوری انسانیت اور معاشرے کی تکمیل کا باعث ہوتی ہے، اسلام کی نظر میں دینی تعلیم مرد وعورت دونوں کے لیے یکساں طور پر مطلوب ہے۔

انہوں نے کہا کہ قرآن کی بطور نزول پہلی آیت ’’اقراء‘‘ ہے جس میں پڑھنے کا حکم دیا گیا ہے آج بریڈفورڈ کی سرزمین پر سینکڑوں کی تعداد میں بچیوں کی گریجویشن ’’اقراء‘‘ ہی کے پیغام کی تکمیل ہے۔ انہوں نے کہا کہ تعلیم ہی وہ ہتھیار ہے جس سے معاشرے میں غربت سمیت مختلف چیلنجوں کا مقابلہ کیا جا سکتا ہے۔

یاد رہے برطانوی جرنلسٹ ایوان رڈلے جنہیں طالبان نے 2001 میں افغانستان میں جاسوسی کے شبے میں اپنی حراست میں رکھا تھا رہائی کے بعد انہوں نے اسلام قبول کر لیا تھا ۔

ناز شاہ ایم پی کا کہنا تھا کہ بچیوں کو قرآن وسنت کی تعلیمات نہ صرف کردار سازی میں بنیاد فراہم کرتی ہیں بلکہ عملی رہنمائی بھی وہیں سے ملتی ہے، انہوں نے المرکز اسلامی کے بانی مفتی حسن رضا کو خراج تحسین پیش کرتے ہوئے کہا کہ یہاں سے سینکڑوں کی تعداد میں طلباء اور طالبات نہ صرف دین بلکہ دنیاوی تعلیم کے زیور سے آراستہ ہوئے ہیں۔

ادارہ کے مہتمم مفتی قاضی حسن رضا نے گریجویشن کی تقریب میں تمام شرکاء کا شکریہ ادا کرتے ہوئے گریجویشن حاصل کرنے والے بچوں اور بچیوں کو خراج تحسین پیش کیا جنہوں نے نا مسا ئد حالات میں بھی دور دراز سے آ کر دین کے لیے اپنے آپ کو وقف کیا آج الحمدللہ اس ادارے سے سیکڑوں بچے اور بچیوں نے اپنی گریجویشن مکمل کی ہے، اس ادارے سے فارغ التحصیل ہونے والی یہ بچے اور بچیاں برطانیہ کے مختلف شعبوں میں بھی اپنا بھرپور کردار ادا کر رہے ہیں۔

انہوں نے اپیل کی کہ بچوں کو دینی تعلیم کی طرف زیادہ سے زیادہ راغب کریں۔

گریجویشن کی تقریب میں گریجویشن حاصل کرنے والے طلباء اور طالبات کے والدین اور مقامی کمیونٹی کے افراد کی ایک بڑی تعداد نے شرکت کی۔ تقریب کے آخر میں صاحبزادہ پیر سلطان نیاز الحسن نے امت مسلمہ کے اتحادواتفاق کے لیے خصوصی دعا کی ۔