ضلع جہلم میں موبائل ٹاورز کی بار بار بندش سے شہری پریشان، مواصلاتی نظام متاثر ہونے لگا
جہلم: ضلع جہلم بھر میں نجی موبائل کمپنیوں کے ٹاورز کی بار بار بندش شہریوں کے لیے شدید مشکلات کا باعث بننے لگی ہے۔ روزانہ کی بنیاد پر اربوں روپے منافع کمانے والی موبائل کمپنیاں صارفین کو معیاری اور تسلسل کے ساتھ مواصلاتی سہولیات فراہم کرنے میں ناکام دکھائی دیتی ہیں۔
رپورٹ کے مطابق جہلم سمیت ضلع بھر میں بجلی کی بندش کے دوران متعدد علاقوں میں موبائل کمپنیوں کے ٹاورز مکمل یا جزوی طور پر بند ہو جاتے ہیں، جس کے باعث موبائل سگنلز، انٹرنیٹ سروسز اور آن لائن رابطے متاثر ہوتے ہیں۔
صارفین کے مطابق ماضی میں موبائل ٹاورز کو جنریٹرز اور بیک اپ بیٹریوں کے ذریعے فعال رکھا جاتا تھا، تاہم اب بیشتر مقامات پر یہ سہولت مؤثر انداز میں موجود نہیں، جس کے نتیجے میں بجلی کی بندش کے ساتھ ہی نیٹ ورک سروس بھی متاثر ہو جاتی ہے۔
شہریوں کا کہنا ہے کہ موبائل اور انٹرنیٹ پیکجز پر بھاری اخراجات کرنے کے باوجود انہیں مطلوبہ سہولیات میسر نہیں آ رہیں، جبکہ سروس بند ہونے کی صورت میں ان کے خریدے گئے کال اور انٹرنیٹ پیکجز بھی متاثر ہوتے ہیں۔
طلبہ نے شکایت کی ہے کہ مواصلاتی نظام میں تعطل کے باعث آن لائن تعلیمی سرگرمیوں، تحقیقی کاموں اور ڈیجیٹل لرننگ کے عمل میں مشکلات پیش آتی ہیں۔ اسی طرح وکلا، تاجر، سرکاری ملازمین اور آن لائن کاروبار سے وابستہ افراد بھی نیٹ ورک کی بندش سے شدید متاثر ہو رہے ہیں۔
شہریوں کے مطابق ہنگامی حالات میں موبائل نیٹ ورک کی معطلی مزید سنگین صورتحال پیدا کر سکتی ہے، کیونکہ رابطے کا بنیادی ذریعہ متاثر ہونے سے امدادی اور ضروری خدمات تک رسائی میں بھی دشواری پیش آ سکتی ہے۔
عوامی اور سماجی حلقوں نے موبائل کمپنیوں کی سروسز پر تشویش کا اظہار کرتے ہوئے متعلقہ حکام سے مطالبہ کیا ہے کہ موبائل آپریٹرز کو لوڈشیڈنگ کے دوران بھی نیٹ ورک سروسز برقرار رکھنے کا پابند بنایا جائے۔ انہوں نے پاکستان ٹیلی کمیونیکیشن اتھارٹی (پی ٹی اے) سمیت متعلقہ اداروں سے مطالبہ کیا کہ صارفین کو معیاری سہولیات کی فراہمی یقینی بنانے کے لیے مؤثر اقدامات کیے جائیں تاکہ شہریوں کو مواصلاتی مسائل سے نجات مل سکے۔
