پنجاب فوڈ اتھارٹی جہلم کی بڑی کارروائی، 1040 لیٹر ملاوٹی دودھ تلف، بھاری جرمانے عائد

جہلم: پنجاب فوڈ اتھارٹی جہلم نے ملاوٹی دودھ کے خلاف بڑی کارروائی کرتے ہوئے 1040 لیٹر پانی ملا دودھ موقع پر تلف کر دیا اور ذمہ داروں پر جرمانے عائد کر دیے۔

ترجمان پنجاب فوڈ اتھارٹی کے مطابق علی الصبح جہلم کے داخلی و خارجی راستوں بالخصوص جی ٹی روڈ پر ناکے لگا کر 27 دودھ بردار گاڑیوں کو چیک کیا گیا، جن میں موجود تقریباً 10 ہزار لیٹر دودھ کی جانچ پڑتال کی گئی۔

کارروائی کے دوران 1040 لیٹر ملاوٹی دودھ برآمد ہونے پر فوری تلف کر دیا گیا، جبکہ ناقص دودھ سپلائی کرنے پر 2 دودھ بردار گاڑیوں کو مجموعی طور پر 75 ہزار روپے جرمانہ کیا گیا۔

فوڈ اتھارٹی کے مطابق یہ دودھ سرگودھا اور منڈی بہاؤالدین سے جہلم، دینہ اور راولپنڈی سپلائی کیا جانا تھا، تاہم بروقت کارروائی سے شہریوں کو مضر صحت دودھ کے استعمال سے بچا لیا گیا۔

حکام کا کہنا ہے کہ دودھ بردار گاڑیوں کی روزانہ بنیادوں پر چیکنگ جاری رہے گی، جبکہ شہری کسی بھی شکایت کی صورت میں ہیلپ لائن 1223 پر رابطہ کر سکتے ہیں۔