دینہ میں دوکاندار اور اسکے کزن کو لوٹنے والے ڈاکو کو اہل علاقہ نے پکڑ لیا، دوسرا فرار

دینہ کے نواحی گاؤں دھنیالہ میں دوکاندار اور اس کے کزن کو لوٹنے ڈاکو کو اہل علاقہ نے پکڑ لیا، ایک ڈاکو فرار ہو گیا۔ اہل علاقہ نے ملزم کو تھانہ منگلا پولیس کے حوالے کر دیا۔

تفصیلات کے مطابق دینہ کے علاقہ دھنیالہ میں سرفراز نامی پیزا شاپ کا مالک اپنے کزن علی کے ہمراہ رات ایک بجے دوکان بند کر کے کالووال جا رہے تھے کہ راستے میں 2 موٹرسائیکل سوار مسلح ڈاکوؤں نے روک لیا۔ ڈاکو جب نقدی، موبائل فون اور اے ٹی ایم کارڈ چھین کر فرار ہونے لگے تو دونوں نوجوانوں نے شور مچایا تو ڈاکو فرار ہو گئے۔

شور سن کر علاقہ کے مکین گھروں سے باہر نکل آئے اور دونوں ڈاکوؤں کا پیچھا کرنا شروع کر دیا جس کی وجہ سے ملزمان نے گھبرا کر موٹرسائیکل کی بتی بند کر دی، اندھیرے کی وجہ سے موٹرسائیکل بے قابو ہو گیا اور دونوں ڈاکو گر گئے۔

اہل علاقہ نے ایک ڈاکو عرفان عرف فانا ولد سلیمان نمبردار سکنہ ریحانہ گوجراں کو موٹرسائیکل سمیت پکڑ کر پولیس تھانہ منگلا کینٹ کے حوالے کر دیا جبکہ دوسرا ملزم اندھیرے کا فائدہ اٹھاتے ہوئے فرار ہو گیا۔