بجوالہ جنگل کو بہترین اور مثالی طرز انتظام کے تحت چلایا جا رہا ہے، سدھیر احمد مغل
جہلم: محکمہ جنگلات کے ڈویژنل فارسٹ آفیسر (ڈی ایف او) سدھیر احمد مغل نے کہا ہے کہ بجوالہ جنگل کو بہترین اور مثالی انتظامی ماڈل کے تحت چلایا جا رہا ہے، جہاں وسیع پیمانے پر شجرکاری جاری ہے اور لکڑی چوری کو تقریباً مکمل طور پر ختم کر دیا گیا ہے۔
ان خیالات کا اظہار انہوں نے گزشتہ روز جہلم پریس کلب کے نمائندہ وفد سے خصوصی گفتگو کے دوران کیا۔ وفد میں صدر الیکٹرانک میڈیا عامر کیانی، چیئرمین جہلم پریس کلب چوہدری عابد محمود، شہریار علی، راجہ مرزا قدیر بیگ، چوہدری تصور حسین، سید مستفیض اقبال بخاری، چوہدری مہربان حسین، سید ناصر محمود اور مرزا فاران بیگ شامل تھے۔
ڈی ایف او سدھیر احمد مغل نے بتایا کہ ان کی تعیناتی کے بعد بجوالہ جنگل میں ماحولیات کے تحفظ اور سبز انقلاب کے لیے ہنگامی بنیادوں پر اقدامات کیے گئے۔ اس سلسلے میں ہزاروں پودے لگائے گئے ہیں جن کی دیکھ بھال کے لیے خصوصی عملہ تعینات ہے تاکہ ان کی افزائش بہتر طریقے سے ہو سکے۔ انہوں نے کہا کہ شجرکاری صرف ایک موسمی مہم نہیں بلکہ پورا سال جاری رہنے والا عمل ہے۔
انہوں نے مزید کہا کہ دو دہائیاں قبل بجوالہ جنگل لکڑی چوروں کی آماجگاہ بن چکا تھا، تاہم سخت نگرانی، جدید ٹیکنالوجی کے استعمال اور اہلکاروں کی محنت کے نتیجے میں اب اس عمل کا مکمل خاتمہ ہو چکا ہے۔ جنگل کے داخلی و خارجی راستوں پر چیک پوسٹیں قائم ہیں، کڑی نگرانی کی جا رہی ہے اور اندر گشت کے نظام کو مزید فعال بنایا گیا ہے۔
ڈی ایف او سدھیر احمد مغل نے عزم ظاہر کیا کہ جنگلات کے تحفظ اور قدرتی ماحول کے فروغ کے لیے ہر ممکن اقدامات جاری رہیں گے۔ انہوں نے عوام اور میڈیا سے اپیل کی کہ وہ ماحول دوست رویوں کو فروغ دیں اور جنگلات کے تحفظ میں اپنا کردار ادا کریں۔
اس موقع پر چیئرمین جہلم پریس کلب چوہدری عابد محمود نے ڈی ایف او کے اقدامات کو سراہتے ہوئے کہا کہ بجوالہ جنگل کا حالیہ انتظامی ماڈل دوسرے اضلاع کے لیے ایک مثال ہے، اور امید ظاہر کی کہ یہ مثبت سلسلہ آئندہ بھی جاری رہے گا۔
